وزیراعظم عمران خان ایف بی آر کی کارکردگی سے خوش،آئی ٹی ٹرانسفارمیشن پلان کی تعریف

وزیراعظم عمران خان نے فیڈرل بورڈ آف ریونیو کی کارکردگی بالخصوص آئی ٹی ٹرانسفارمیشن اور ٹریک اینڈ ٹریس سسٹم  کو سراہا ہے، انہوں نے توقع ظاہر کی ہے کہ جولائی تک ٹرانسفارمیشن پلان مکمل ہونے سے ریونیو میں 100 ارب روپے کا اضافہ ہوگا۔

سماجی رابطوں کی ویب سائٹ ٹویٹر پر جاری اپنے ایک بیان میں وزیراعظم عمران خان نے سات ماہ کا ٹیکس ٹارگٹ مکمل کرنے پر فیڈرل بورڈ آف ریونیو کی تعریف کی ہے اور کہا کہ بولڈ ٹیکس آڈٹ کے نفاذ  اور ایف بی آر کے انسداد اسمگلنگ اقدامات کے نتیجے میں ریونیو ٹارگٹ مکمل ہوا۔

وزیراعظم نے تاکید کی کہ فیڈرل بورڈ آف ریونیو کو ایمانداری اور عزم کے ساتھ کام جاری رکھنا چاہیے، وزیراعظم نے ایف بی آر میں آئی ٹی ٹرانسفارمیشن پلان اور ٹریک اینڈ ٹریس سسٹم  اور ہیڈ آفس ٹیم کی کارکردگی کو بھی سراہا۔

اپنے بیان میں وزیراعظم عمران خان کا کہنا تھا کہ جولائی تک ٹرانسفارمیشن پلان مکمل ہونے سے 100 ارب روپے کا ریونیو میں اضافہ ہو گا، جبکہ پلان سے جعلسازی کو روکنے اور قانون کی حکمرانی کے قیام میں مدد ملے گی۔