نواز شریف بھاگ رہے ہیں، اثاثے نیلام کر دیں، احتساب عدالت حکم

مسلم لیگ (ن) کے قائد میاں نواز شریف کی مشکلات مزید بڑھ گئیں،  اسلام آباد کی احتساب عدالت نے توشہ خانہ ریفرنس میں اشتہاری ملزم نواز شریف کی جائیداد نیلامی کا حکم دے دیا۔ عدالت نے قرار دیا ہے کہ نوازشریف کی جہاں جہاں جائیداد ہے، متعلقہ صوبائی حکومت نیلام کرسکے گی۔

سابق وزیراعظم نواز شریف کی جائیداد نیلامی کیلئے قومی احتساب بیورو کی جانب سے اسلام آباد کی احتساب عدالت میں درخواست دائر کی گئی تھی، جس میں موقف اپنایا گیا تھا کہ ن لیگ کے قائد نواز شریف توشہ خانہ کیس میں اشتہاری قراردیئے جا چکے ہیں، ان کی جائیداد نیلام کرنے کی اجازت دی جائے۔

احتساب عدالت نے نیب کی درخواست منظور کرتے ہوئے نواز شریف کی جائیداد نیلام کرنے کا حکم دے دیا ہے، عدالت کی جانب سے چیئرمین سیکورٹیز اینڈ ایکسچینج کمیشن آف پاکستان کو نواز شریف کی مختلف کمپنیوں کے شیئرز نیلام کرنے حکم دیا ہے جب کہ ڈپٹی کمشنر لاہور اور ڈپٹی کمشنر شیخو پورہ کو سابق وزیراعظم کے نام اراضی فروخت کرنے کے احکامات جاری کر دیئے گئے ہیں۔

عدالتی حکم میں قرار دیا گیا ہے کہ نوازشریف کی جہاں جہاں جائیداد ہے، متعلقہ صوبائی حکومت نیلام کرسکے گی،ڈپٹی کمشنر لاہور اور شیخو پورہ ساٹھ دن کے اندر رپورٹ پیش کریں، جائیدادیں نیلام کر کے رقم قومی خزانے میں جمع کرائی جائے۔

عدالت نے حکم دیا کہ نوازشریف کی گاڑیاں بھی تیس دن کے اندر نیلام کی جائیں، پولیس کی مدد سے گاڑیاں قبضے میں لے کر بیچی جائیں، نواز شریف کے بنک اکاؤنٹس سے رقوم سرکاری خزانے میں منتقل کرنے کا بھی حکم دیا گیا ہے۔جس جس جائیداد پر اعتراض نہیں آیا نیلام کی جا سکے گی، واضح رہے کہ  مریم نواز نے مری اور چھانگلہ گلی کے گھر کی ضبطگی پر اعتراض کر رکھا ہے۔

نواز شریف کی جائیداد کی تفصیلات

ایس ای سی پی کے مطابق چارکمپنیوں میں نواز شریف حصہ دار ہیں، ان کے محمد بخش ٹیکسٹائل ملز میں 4 لاکھ 67 ہزار 950، حدیبیہ پیپر ملز میں 3لاکھ 43 ہزار 425 شیئرز ہیں۔ حدیبیہ انجینئرنگ کمپنی میں نواز شریف کے شیئرز کی تعداد 22 ہزار 213 ہے، جب کہ اتفاق ٹیکسٹائل ملز میں نواز شریف 48ہزار 606 حصص کے مالک ہیں۔

قومی احتساب بیورو کے مطابق نواز شریف کے مختلف بینکوں میں 3 غیرملکی کرنسی اکاؤنٹس سمیت 8 اکاؤنٹس جن میں سے5 بینک اکاؤنٹس میں 6 لاکھ 12 ہزار روپے موجود ہیں، غیرملکی کرنسی اکاؤنٹس میں 566 یورو، 698 امریکی ڈالرز اور 498 برطانوی پاؤنڈز موجود  ہیں۔

نیب کے مطابق ایل ڈی اے، لاہوراورشیخو پورہ کےایڈیشنل ڈپٹی کمشنرز، مری کے اسسٹنٹ کمشنر اورگلیات ڈویلپمنٹ اتھارٹی نےنواز شریف اور ان کے زیرکفالت افراد کے نام جائیدادوں سے متعلق رپورٹ دی، جن میں مری میں بنگلہ، چھانگلہ گلی ایبٹ آباد میں 15 کنال کا مکان اور اپر مال لاہور پر جائیداد شامل ہیں۔

نواز شریف اور ان کے زیر کفالت افراد کے نام 1752 کنال سے زائد زرعی اراضی، لاہور کے موضع مانک میں 936 کنال، موضع بڈوکسانی میں 299 کنال زرعی اراضی، لاہور کے موضع مال رائے ونڈ میں 103 کنال، موضع سلطانکے میں 312 کنال، ضلع شیخو پورہ کے موضع منڈیالی میں 14 کنال اور موضع فیروزوطن میں 88 کنال اراضی شامل ہے۔