کورونامزید104 زندگیاں نگل گیا،اموات 19 ہزارسےمتجاوز،3869نئےکیسز

پاکستان میں تمام تر کوششوں کے باوجود کورونا وائرس کا پھیلاؤ جاری ہے، قاتل وائرس نے ایک سو سے زائد زندگیوں کا خاتمہ کر دیا جس کے بعد ملک میں مجموعی اموات19 ہزار200 سے تجاوز کر گئیں، جب کہ ایک دن میں 3 ہزار 800 سے زائد نئے کیسز رپورٹ ہوئے ہیں۔

نیشنل کمانڈ اینڈ آپریشن سینٹر کی جانب جاری تازہ اعداد و شمار کے مطابق گزشتہ 24 گھنٹوں کے دوران ملک بھر میں 38 ہزار 616 افراد کے کورونا ٹیسٹ کیے گئے جن میں 3 ہزار 869 افراد میں وائرس کی تصدیق ہوئی جس کے بعد اب تک رپورٹ ہونے والے کیسز کی تعداد 8 لاکھ 67 ہزار438 تک پہنچ گئی ہے۔

کورونا کیسز کے لحاظ سے پنجاب بدستور سرفہرست ہے جہاں پر اب تک 3 لاکھ 22 ہزار 117 افراد اس وباء سے متاثر ہو چکے ہیں، سندھ میں کورونا وائرس سے متاثرہ افراد کی تعداد 2 لاکھ 94 ہزار 251 ہے، خیبرپختونخوا میں ایک لاکھ  25 ہزار 392، بلوچستان میں 23 ہزار 655، اسلام آباد میں 78 ہزار 560، آزادکشمیرمیں 18 ہزار 56 اور گلگت بلتستان میں 5 ہزار 407 کورونا کیسز رپورٹ ہو چکے ہیں

حکومت کی جانب سے تمام تر اقدامات کے باوجود کورونا وائرس انسانی زندگیوں کو نگل رہا ہے، گزشتہ چوبیس گھنٹوں کے دوران قاتل وائرس نے مزید 104 افراد کی زندگیوں کے چراغ گل کر دیئے جس کے بعد ملک میں اب تک اس وباء سے ہونے والی اموات کی تعداد 19 ہزار 210 تک پہنچ گئی ہے، ایکٹو کیسز کی تعداد 76 ہزار 536 ہے، جن میں سے 623 مریض  وینٹی لیٹرز پر ہیں، 5 ہزار 184 مریض مختلف اسپتالوں میں زیرعلاج ہیں جب کہ 7لاکھ 71 ہزار 692 مریض مکمل طور پر صحتیاب ہوچکے ہیں۔