فلسطین میں پیدا انسانی المیے کے فوری تدارک کی ضرورت ہے، شاہ محمود قریشی

فلسطینیوں کیلئے عالمی سطح پر موثر آواز بلند کرنے کا پاکستانی مشن کامیابی سے جاری ہے، وزیر خارجہ شاہ محمود قریشی کا کہنا ہے کہ اسرائیلی بربریت سے فلسطین میں پیدا ہونے والے انسانی المیے کے فوری تدارک کیلئے عالمی سطح پر مشترکہ کوششوں کی ضرورت ہے۔

وزیرخارجہ مخدوم شاہ محمود قریشی نے فلسطین کے حوالے سے منعقدہ اقوام متحدہ جنرل اسمبلی کے ہنگامی اجلاس میں شرکت کیلئے آنے والے وزرائے خارجہ کے اعزاز میں عشائیہ دیا۔ نیویارک میں واقع پاکستانی سفارتخانے میں دیئے گئے عشائیہ میں ترکی، فلسطین، تیونس کے وزرائے خارجہ کے علاوہ صدر جنرل اسمبلی والکر بوزکر اور او آئی سی ممالک کے اقوام متحدہ میں مستقل مندوبین شریک ہوئے۔

  وزیرخارجہ مخدوم شاہ محمود قریشی نے معزز مہمانوں کو پاکستانی سفارتخانے میں تشریف آوری پر خوش آمدید کہا، اس موقع پر اپنے استقبالیہ خطاب میں شاہ محمود قریشی نے کہا کہ نہتے فلسطینیوں پر اسرائیلی بربریت، انسانی حقوق کی سنگین خلاف ورزیوں اور امن و امان کو درپیش شدید خطرات ہیں،اس نئے انسانی المیے کے تدارک کیلئے مشترکہ کاوشیں بروئے کار لانے کی ضرورت ہے۔

وزیرخارجہ نے معزز مہمانوں کو فلسطین میں قیام امن کے حوالے سے  پاکستان کی جانب سے بروئے کار لائی گئی سفارتی کاوشوں سے آگاہ کیا، انہوں نے اقوام متحدہ، جنرل اسمبلی کے ہنگامی اجلاس میں مشترکہ لائحہ عمل اختیار کرنے اور عالمی برادری کی توجہ فلسطین کی تکلیف دہ صورتحال کی جانب مبذول کروانے کیلئے تفصیلی مشاورت بھی کی

فلسطین کے حوالے سے اقوام متحدہ جنرل اسمبلی کا ہنگامی اجلاس 20 مئی کو منعقد ہوگا، وزیر خارجہ مخدوم شاہ محمود قریشی اقوام متحدہ جنرل اسمبلی کے ہنگامی اجلاس میں پاکستانی قوم کے جذبات کی ترجمانی کرتے ہوئے،معصوم فلسطینیوں کے حق میں بھرپور آواز بلند کریں گے، اقوام متحدہ میں پاکستان کے مستقل مندوب منیر اکرم اور امریکہ میں تعینات پاکستان کے سفیر اسد مجید خان بھی اس موقع پر موجود تھے۔