افغان سرزمین سے پاکستان میں حملے سلامتی و استحکام کیلئے مستقل خطرہ ہیں، زاہد حفیظ

پاکستان نے کالعدم تحریک طالبان پاکستان سے متعلق افغان وزارت خارجہ کا بیان مسترد کر دیا، ترجمان دفتر خارجہ زاہد حفیظ چوہدری نے کہا ہے کہ پاکستان میں سرحد پار حملوں سے سلامتی اور استحکام کو مستقل خطرہ لاحق ہے۔

ترجمان دفتر خارجہ کی جانب سے جاری بیان میں کہا گیا ہے کہ افغانستان کا بیان اقوام متحدہ کی رپورٹس اور زمینی حقائق کے برخلاف ہے، پچھلے کئی برسوں میں تحریک طالبان پاکستان نے پاکستان میں متعدد دہشت گرد حملے کیے۔ کالعدم ٹی ٹی پی نے پاکستان میں دہشت گردی کے لیے افغان سرزمین استعمال کی۔

زاہد حفیظ چوہدری کا کہنا ہے کہ اقوام متحدہ مانیٹرنگ ٹیم رپورٹ میں ٹی ٹی پی کے پاکستان مخالف مقاصد کو تسلیم کیا گیا۔ پاکستان میں سرحد پار حملوں سے سلامتی اور استحکام کو مستقل خطرہ لاحق ہے۔ پاکستان کا بلا امتیاز دہشت گردی کے خلاف ہر طرح کا مقابلہ کرنے کا عزم واضح ہے۔

پاکستان نے امن کے لیے افغانستان پاکستان ایکشن پلان کے موثر استعمال کی ضرورت پر زور دیا ہے۔ ترجمان دفتر خارجہ کا کہنا ہے کہ پاکستان انٹرا افغان امن عمل کو آسان بنانے کے لیے مخلصانہ کوششیں کر رہا ہے، امید ہے افغانستان میں دیرپا امن کے لیے افغان موقع سے فائدہ اٹھائیں گے۔