ذی الحج کا چاند نظر نہیں آیا، پاکستان میں عیدالاضحیٰ 21 جولائی کو ہوگی

ملک بھر میں ذی الحج کا چاند نظر نہیں آیا، یکم ذی الحج 12 جولائی اور عید الاضحی 21 جولائی بروز بدھ کو ہوگی۔

پاکستان میں ذی الحج 1442 ہجری کاچاند دیکھنے کے لیے رویت ہلال کی مرکزی اور زونل کمیٹیوں کے اجلاس منعقد ہوئے۔ مرکزی رویت ہلال کمیٹی کا اجلاس کراچی میں چیئرمین مولانا سید عبدالخبیرآزاد کی زیر صدارت منعقد ہوا۔

پاکستان میٹرولوجیکل ڈیپارٹمنٹ نے بھی اپنی ویب سائٹ پر کہا ہے کہ پاکستان میں ذی الحج کا چاند آج صبح 6 بج کر18 منٹ پر پیدا ہوچکا ہے تاہم ہفتہ کی شب اس کے نظر آنے کے کوئی امکانات نہیں۔

ماہرین نے کہا تھا کہ ہفتہ کی شب چاند نظر نہیں آسکتا کیوں کہ چاند دکھائی دینے کے لیے اس کی عمرکم از کم 19 گھنٹے ہونی چاہیے جب کہ سورج اور چاند کے غروب ہونے کا درمیانی فرق 40 منٹ سے زیادہ ہونا چاہیے۔