پاکستان کو ایف اے ٹی ایف اہداف پر بڑی کامیابیاں، اے پی جی کا اظہار اطمینان

فنانشنل ایکشن ٹاسک فورس کی ذیلی تنظیم نے پاکستان کی جانب سے ایف اے ٹی ایف اہداف کے حصول میں نمایاں کامیابیوں کا اعتراف کیا ہے۔

فنانشل ایکشن ٹاسک فورس کی ذیلی تنظیم ایشیاء پیسیفک گروپ نے پاکستان کو دیئے گئے اہداف پر کی کارکردگی رپورٹ جاری کر دی ہے، جس میں ایف اے ٹی ایف اہداف پر حکومت پاکستان کی پیشرفت اور کارکردگی پر اطمینان کا اظہار کیا گیا ہے۔

واضح رہے کہ فنانشل ایکشن ٹاسک فورس کے ایشیاء پیسفک گروپ جیسے تکنیکی فورم کو بھارت پاکستان کے خلاف سیاسی مقاصد کے لئے استعمال کرتا رہا ہے، تاہم پاکستان نے اپنی نمایاں کارکردگی کے ذریعے اے پی جی کو مطمئن کیا۔

ایشیاء پیسیفک گروپ کی رپورٹ میں کہا گیا ہے کہ پاکستان نے انسداد منی لانڈرنگ سمیت بیش تر اہداف پر بہترین کارکردگی دکھائی، پاکستان نے انسداد منی لانڈرنگ کے لیے بہتر قوانین بنائے، منی لانڈرنگ روکنے کے لئے پاکستان کے اقدامات اطمینان بخش ہیں۔

اے پی جی رپورٹ کے مطابق پاکستان کو دیئے گئے 40 اہداف میں سے 39 پر بہترین کارکردگی دکھائی،  صرف ایک ہدف جس کے حصول میں پاکستان کو خاطر خواہ کامیابی نہیں ملی وہ پاکستان پوسٹ کی اپ گریڈیشن ہے۔ پاکستان پوسٹ کو اپ گریڈ کرنے اور ادارے کے مالیاتی امور کو دستاویزی بنانے کی ضرورت ہے۔

فنانشل ایکشن ٹاسک فورس کی ذیلی تنظیم کا کہنا ہے کہ پاکستان میں پراپرٹی کے شعبے میں مشکوک سرمایہ اب تک رپورٹ نہیں ہوئی تاہم جائیداد کی خرید و فروخت کے نام پر مشکوک سرمایہ کاری کے خلاف اقدامات کی ضرورت ہے۔