آزادکشمیرمیں سیاحت بڑھانے کیلئےترجیحی اقدامات اٹھائیں گے،سردار عبدالقیوم نیازی

وزیراعظم آزاد جموں وکشمیر سردارعبدالقیوم نیازی نے کہا ہے کہ آزاد کشمیر میں سیاحت کے فروغ کیلئے ترجیحی بنیادوں پر اقدامات اٹھانے کے ساتھ سرمایہ کاروں کو تحفظ فراہم کریں گے۔

وزیراعظم آزاد جموں و کشمیر نے سیالکوٹ دورے کے دوران تاجروں کے وفد سے ملاقات کی، اس موقع پر مشیر صنعت و پیداوار چوہدری مقبول گجر، معاون خصوصی حافظ حامد رضا،صوبائی وزیرچوہدری اخلاق، تحریک انصاف کے مرکزی رہنما عمرڈارو دیگر بھی موجود تھے۔ تاجربرادری نے وزیراعظم سردار عبدالقیوم نیازی کو آزاد کشمیر میں سرمایہ کاری کی خواہش اور  وہاں درپیش مسائل سے آگاہ کیا۔

تاجروں کا کہنا تھا کہ ہمیں آپ کے وزیراعظم بننے سے یہ امید پیدا ہوئی ہے کہ اب ہمارے لیے وہاں آسانیاں پیدا کی جائیں تاکہ ہم بھی آزاد کشمیر میں سرمایہ کاری کر سکیں، وزیراعظم نے وفد سے گفتگو کرتے ہوئے کہا کہ آزاد کشمیر میں سرمایہ کاری کو درپیش مسائل سے آگاہ ہوں، ٹیکس سمیت تمام مسائل کو جلد حل کریں، سرمایہ کاروں کو تحفظ فراہم کیا جائے۔

وزیراعظم کا کہنا تھا کہ آزاد کشمیر سیاحت اور آئی ٹی میں وسیع سرمایہ کاری کے مواقع موجود ہیں، کاروباری افراد استفادہ حاصل کریں، ہم ہر ممکن تعاون فراہم کریں گے۔حکومت آزاد کشمیر سیاحت اور ہائیڈل سیکٹر میں سرمایہ کاری کی حوصلہ افزائی کر رہی ہے، آزاد کشمیر سیاحوں کی جنت ہے۔