پاکستان سے پھلوں اور سبزیوں کی برآمدات میں 9 کروڑ 70 لاکھ ڈالر کا اضافہ

کورونا کے باوجود رواں سال پاکستان سے پھلوں اور سبزیوں کی برآمدات میں9 کروڑ 70  لاکھ ڈالر کا اضافہ ریکارڈ ہوا ہے، پھلوں و سبزیوں کی مجموعی برآمدات 56 کروڑ 80  لاکھ ڈالر سے بڑھ کر ساڑھے 66 کروڑ ڈالرتک پہنچ گئی ہیں۔

پاکستان فرویٹ اینڈ ویجیٹیبل ایکسپورٹرزایسوسی ایشن کے ترجمان نے بتایاکہ جنوبی کوریا، جاپان اور ماریشس نے پاکستانی پھلوں کی درآمد کی اجازت دیدی ہے اس طرح اب پاکستانی فروٹ ایکسپورٹرز اعلی معیار کے پھل جنوبی کوریا، جاپان اور ماریشس کو بھی برآمد کرسکیں گے۔

انہوں نے بتایاکہ حکومتی کوششوں کے باعث مشرق وسطی کے ممالک کو آلو کی برآمد کی اجازت بھی دے دی گئی ہے اس طرح آلو کی زیادہ سے زیادہ برآمد سے بھی قیمتی زرمبادلہ حاصل ہوسکے گا۔ انہوں نے بتایاکہ گزشتہ سال کے دوران پاکستان نے آلو، پیاز، کنوکی برآمد کے نئے ریکارڈ قائم کئے ہیں۔

ان کا کہنا تھا کہ کورونا سمیت بعض دیگر وجوہات کی بنا پر امریکہ سمیت کچھ دیگر ممالک کو آم کی برآمد نہ کی جاسکی ہے۔ انہوں نے کہاکہ رواں سال بھی پاکستان کے موسمی حالات اور آب و ہوا کے باعث پھلوں اور سبزیوں کی شاندار فصل حاصل ہونے کا امکان ہے۔