وزیراعظم عمران خان نے وزرا کو وجیہہ الدین کے بیانات پر ردعمل سے روک دیا

اسلام آباد: وزیراعظم عمران خان  کے  زیر صدارت پارٹی ترجمانوں کا اجلاس ہوا جس میں اپوزیشن لیڈر شہباز شریف کے منی لانڈرنگ کیس کی تفصیلات کا جائزہ لیا گیا۔ معاون خصوصی احتساب شہزاد اکبر نے کیس کے قانونی نکات پر بریفنگ دی۔ اجلاس سے گفتگو کرتے ہوئے وزیراعظم عمران خان نے وزرا کو وجیہہ الدین کے بیانات پر ردعمل سے روکتے ہوئے کہا کہ جسٹس (ر) وجیہہ الدین کے بیانات کو میڈیا نے اتنا اچھالا مگر اپوزیشن کی کرپشن پر کوئی بات نہیں کرتا، میرے کوئی لاکھوں کے اخراجات نہیں، اپوزیشن جماعتوں کے لیڈرز نے ملکی خزانہ لوٹا، اس پر زیادہ بات ہونی چاہئے

اجلاس میں ملک میں توانائی، گیس کی قلت اور حکومتی اقدامات کا بھی جائزہ لیا گیا، وزیر توانائی حماد اظہر نے وزیراعظم اور شرکاء کو بریف کیا،، مشیر خزانہ شوکت ترین نے شرکا کو معاشی اعدادوشمار پر اعتماد میں لیتے ہوئے بتایا کہ حالیہ اقدامات سے مہنگائی میں کمی کا ٹرینڈ دیکھنے میں آئے گا، وزیراعظم کا کہنا تھا کہ عوامی ریلیف اور مہنگائی میں کمی حکومتی ترجیحات ہیں۔