محمد رضوان سمیت 4 کھلاڑی کرکٹر آف دی ایئر کے لیے نامزد

  کراچی :آئی سی سی نے پاکستان کے وکٹ کیپر بیٹسمن محمد رضوان سمیت چار کھلاڑیوں کو کرکٹر آف دی ایئر نامزد کردیا۔

آئی سی سی کی جانب سے کرکٹر آف دی ایئر میں شامل دیگر کھلاڑیوں میں آسٹریلیا کےمچل مارش، انگلینڈ کے جوز بٹلر اور سری لنکا کے ہسا رنگا بھی ہیں۔

پاکستان کرکٹ ٹیم کے مایہ ناز بلے باز اور وکٹ کیپر محمد رضوان نے اپنے ٹی ٹوینٹی کریئر کے 55 میچز کی صرف 44 اننگز میں 51 اعشاریہ 21 کی اوسط سے 1 ہزار 639 رنز بنا رکھے ہیں، جس میں 1 سینچری اور 13 نصف سینچریاں بھی شامل ہیں۔

 سال 2021 میں محمد رضوان نے بہترین بلے بازی کا مظاہرہ کرتے ہوئے ناصرف پاکستانی ٹیم کو کامیابیوں سے ہمکنار کیا بلکہ متعدد ریکارڈ بھی اپنے نام کئے، انہوں نے ایک سال میں انٹرنیشنل ٹی ٹوئنٹی کرکٹ میں ہزار سے زائد اور مجموعی طورپر مختصر طرز کے میچز میں 2 ہزار رنز بنانے کا منفرد ریکارڈ بھی قائم کیا، کئی ریکارڈ پاش پاش کرنے والے پاکستانی بلے باز نے رواں سال صرف 29 میچز میں 73 اعشاریہ 66 کی اوسط سے 1326 رنز بنائے، جب کہ مخالف ٹیموں کے 24 کھلاڑیوں کو اپنی بہترین وکٹ کیپنگ کی بدولت پویلین واپس بھیجا، رضوان اس سال 42 چھکے اور 119 چوکے لگا کر نیوزی لینڈ کے جارح مزاج بلے باز مارٹن گپٹل کو بھی پیچھے چھوڑ دیا۔