فرانس میں جعلسازی، منی لانڈرنگ میں ملوث 11 پاکستانی افراد کی گرفتار

جرمن خبر رساں ادارے کے مطابق فرانسیسی پولیس نے جعلی دستاویزات بنانے اور ان کے استعمال سے جعلی کمپنیاں قائم کرنے کے علاوہ تارکین وطن کو غیر قانونی طریقے سے ملازمت دینے، منی لانڈرنگ اور بینک فراڈ جیسے الزامات کے تحت 11 پاکستانیوں کو گرفتار کر لیا ہے۔فرانسیسی پولیس کی جانب سے پیرس کے مضافاتی علاقے میں گرفتار کیے گئے گیارہ افراد کا تعلق پاکستان سے بتایا گیا ہے۔ پولیس کے مطابق گرفتاری کے وقت ان افراد سے 134,000 یورو نقد برآمد ہوئے ہیں۔

پولیس نے اپنی رپورٹ میں بتایا ہے کہ تمام پاکستانیوں نے جعلی دستاویزات کے ذریعے 180 بینک اکاؤنٹس کھولے۔ ان میں سے زیادہ تر بینک اکاؤنٹس جعلی کمپنیوں کے نام پر بنائے گئے تھے۔ اس نیٹ ورک نے 2019 سے 2021 تک غیر قانونی طور پر 41 ملین یورو کی لانڈرنگ بھی کی ہے۔ پولیس نے ملزمان سے 287 جعلی دستاویزات بھی برآمد کی ہیں۔ ان دستاویزات کو جعلی بینک اکاونٹس کھولنے کے لئے استعمال کیاگیا۔

 پولیس نے مزید بتایا کہ ان پاکستانی افراد کے خلاف تفتیش سن 2020 میں اس وقت شروع کی گئی جب ایک مشتبہ شخص کے بارے میں پولیس کو اطلاع ملی کہ ایک پاکستانی شخص جعلی دستاویزات کے ساتھ پاکستان سے ترکی اور یونان کے راستے سے فرانس پہنچا ہے۔