مسقط یونیورسٹی میں ثقافتی نمائش، پاکستانی سٹال خوبصورتی کے باعث توجہ کا مرکز

عمان کے شہر مسقط میں مسقط یونیورسٹی الغبرة کے وسیع و عریض ہال میں مختلف ممالک کی ثقافت کو دکھانے کے لئے ثقافتی نمائش منعقد کی گئی۔ نمائش میں پاکستان کا اسٹال بڑی خوبصورتی، محنت اور مہارت سے سجایا گیا تھا۔

پاکستان کے اسٹال پر تمام صوبوں کی مشہور سوغاتوں اور مصنوعات کو بے حد دلفریب انداز میں پیش کیا گیا۔ جس کی وجہ سے پاکستانی اسٹال پر ھمہ وقت بے انتہا رش رہا اور سینکڑوں لوگوں نے پاکستانی اسٹال پر مختلف اشیاء میں اپنی دلچسپی کا اظہار کیا۔پاکستانی اسٹال پر پاکستان کے انواع اقسام کے لذیذ اور چٹخارے دار کھانوں کا بھی انتظام تھا اور کھانے زعیم فوڈز کی وساطت سے مہیا کئے گئے تھے۔جنہیں بے حد پسند کیا گیا۔

 نمائش میں سفیر پاکستان عمران چوہدری نے خصوصی شرکت کی۔ سفیر پاکستان نے فرداً فرداً تمام اسٹالوں کا دورہ کیا اور گہری دلچسپی کا اظہار کیا سفیر صاحب نے پاکستانی اسٹال کی بے حد تعریف کی اور منتظمین کو داد و تحسین سے نوازہ۔پروگرام کے آخر میں پاکستانی اسٹال کو بہترین اسٹال کے انعام سے بھی نوازا گیا۔