سیکورٹی فورسز کے شمالی وزیرستان، بنوں میں آپریشنز، 7 دہشتگرد ہلاک

سیکیورٹی فورسز نے شمالی وزیرستان اور بنوں میں 2 مختلف آپریشنز کے دوران 7 دہشت گرد ہلاک کر دیئے۔

مسلح افواج کے شعبہ تعلقات عامہ کے مطابق سیکیورٹی فورسز نے شمالی وزیرستان کے علاقے حسن خیل اور بنوں کےعلاقے جانی خیل میں دہشت گردوں کی موجودگی کی خفیہ اطلاعات پر الگ الگ آپریشنز کئے،کارروائیوں کے دوران فائرنگ کے تبادلے میں 7 دہشت گرد مارے گئے۔

آئی ایس پی آر کے مطابق جانی خیل میں آپریشن کے دوران 5 دہشت گرد ہلاک ہوئے، جبکہ شمالی وزیرستان کے علاقے حسن خیل میں آپریشن کے دوران 2 دہشت گرد مارے گئے، خفیہ اطلاعات پر کی گئی کارروائیوں میں کثیر تعداد میں گولیاں اور ہتھیار بھی برآمد کر لئے گئے۔

آئی ایس پی آر کے مطابق مارے جانے والے دہشت گرد سیکیورٹی فورسز پر حملوں اور دہشت گردی کی وارداتوں میں ملوث تھے، مقامی عمائدین نے دہشت گردی کے خاتمے کیلئے سیکورٹی فورسز سے مکمل تعاون کا عزم کا اعادہ کیا ہے۔