وزیراعظم کے یوٹیلٹی اسٹورز پر ریلیف پیکج میں 30 جون تک توسیع کی منظوری

اسلام آباد : اقتصادی رابطہ کمیٹی نے وزیراعظم کے یوٹیلٹی اسٹورز پر ریلیف پیکج میں 30 جون تک توسیع کی منظوری دے دی۔ یوٹیلیٹی سٹورز پر ملک بھر میں گھی 300 روپے فی کلو فراہم کرنے کی بھی منظوری۔ یوٹیلیٹی سٹورز کیلئے 3 ارب 44 کروڑ روپے کی سپلیمنٹری گرانٹ کی منظوری دی

وزیر خزانہ مفتاح اسماعیل کی زیر صدارت اقتصادی رابطہ کمیٹی کا اجلاس ہوا جس میں وفاقی وزراء، سیکرٹریز اور دیگر اعلی حکام نے شرکت کی۔اجلاس میں وزیراعظم کے یوٹیلٹی اسٹورز پر ریلیف پیکج میں 9 جون تک توسیع کی منظوری دی گئی۔کمیٹی نے یوٹیلیٹی سٹورز پر ملک بھر میں گھی 300 روپے فی کلو فراہم کرنے کی منظوری بھی دی۔ اقتصادی رابطہ کمیٹی نے یوٹیلیٹی سٹورز کیلئے 3 ارب 44 کروڑ روپے کی سپلیمنٹری گرانٹ کی منظوری دی جبکہ چار طیاروں کی لیز پر عائد 17 فیصد سیلز ٹیکس کی 1.58 ارب کی ادائیگی کی منظوری بھی دی۔ یہ چار طیارے حج آپریشن کودیکھتے ہوئے 9.388 ارب کی لیز پر حاصل کئے گئے ہیں۔ گلگت سے شندور شاہراہ کی تعمیر کےلئے چار ارب روپے کے اضافی فنڈز کی فراہمی کی منظوری بھی دی گئی۔ کمیٹی نے میسرز مول کمپنی کو ٹل بلاک سے تیل کی پیداوار کی مشروط اجازت دی اور بجلی کے ٹیرف کی ری بیسنگ کی منصوبے کی منظوری دے دی ہے۔ آئل مارکیٹنگ کمپنیوں کو قیمتوں میں فرق کی ادائیگی کیلئے 25.61 ارب روپے کی سپلیمنٹری گرانٹ کی منظوری بھی شامل ہے۔ پی ایس او اور پی ایل ایل کےلئے ایل این جی اور پٹرولیم مصنوعات کی مد میں 36 ارب فنڈز کی فراہمی کی منظوری ہو چکی ہے۔ ایف بی آر کے ایک ارب 52 کروڑ کی سپلیمنٹری گرانٹ کی منظوری بھی دی گئی