شہزاد سلیم نےطیبہ گل کو 10 کروڑ روپے ہرجانے کا نوٹس بھیج دیا

اسلام آباد : طیبہ فاروق گل کی جانب سے ہراسانی کا الزام لگائے جانے پر ڈی جی نیب شہزاد سلیم نےطیبہ گل کو 10 کروڑ روپے ہرجانے کا نوٹس بھیج دیا۔

شہزاد سلیم کی جانب سے بھیجے گئے نوٹس میں کہا گیا کہ میری کال ریکارڈ کرکے میری آڈیو کو غلط استعمال کیا گیا، طیبہ گل کے معاملے میں جو بھی کارروائی کی وہ قانون کے مطابق تھی۔ طیبہ گل کے خلاف شکایات نیب لاہور کو موصول ہوئی تھیں، طیبہ گل ایک کیس میں مدعی اور ایک کیس میں ملزمہ رہیں۔ اس حوالے سے ترجمان نیب نوازش علی نے بھی کہا ہے کہ ان کی طیبہ گل سے کبھی ملاقات نہیں ہوئی، طیبہ فاروق گل نے میرے حوالے سے غلط بیانی کی۔
خیال رہے کہ گزشتہ روز طیبہ گل نے اپنے بیان میں کہا تھا کہ نیب لاہور کے ڈائریکٹر جنرل شہزاد سلیم کے سامنے میرا دوپٹہ کھینچا گیا، میرے کپڑے اتارے گئے اور میری ویڈیو بنائی گئی جو بعد میں یہ لوگ میرے شوہر کو دکھاتے تھے۔ جب میں شوہر سے ملنے جاتی تو عمران ڈوگر مجھے دھمکیاں دیتا تھا جبکہ ترجمان نیب نوازش نے جھنگ آکر مجھ سے کہا کہ چیئرمین نیب سے صلح کر لیں اور مجھے پنجاب کے کئی اضلاع سے پولیس کی کالز آنے لگیں تو میں نے تنگ آکر جاوید اقبال کی ویڈیوز کے اسکرین شاٹ کے ساتھ سابق وزیراعظم عمران خان کے پورٹل پر شکایت درج کرائی تھی۔طیبہ گل کا کہنا تھا کہ پبلک اکاؤنٹس کمیٹی میں جو بھی الزام لگایا درست لگایا،چاہیں تو آڈیو ویڈیو کی فارنزک کرا لیں۔