وفاق نے 28 ارب فراہم کیے ہیں، 3 ستمبر تک امداد کی فراہمی مکمل ہو جائیگی، وزیراعظم

چار سدہ: وزیراعظم میاں شہباز شریف نے کہا ہے کہ ہم سیلاب متاثرین کے ساتھ ہیں، مایوس نہیں کریں گے، سیلاب متاثرین کی امداد کے لیے وفاق نے 28 ارب روپے فراہم کیے ہیں، تین ستمبر تک سیلاب متاثرین کی امداد کی فراہمی مکمل کرنے کے احکامات بھی جاری کردیے ہیں۔

وزیراعظم شہباز شریف نے چاسدہ میں سیلاب متاثرین کے لیے قائم کیے جانے والے ریلیف کیمپوں کا بھی دورہ کیا جہاں انہوں نے لوگوں کے مسائل سنے، انہیں حل کرنے کی یقین دہانی کرائی۔ اس موقع پراعلیٰ حکام کی جانب سے وزیراعظم کو سیلابی صورتحال، ہونے والے نقصانات اور متاثرین کو درپیش مشکلات کے حوالے سے بریفنگ بھی دی گئی۔

چار سدہ میں سیلاب سے متاثرہ علاقوں کے دورے اور متاثرین سے گفتگو کرتے ہوئے وزیراعظم شہباز شریف نے کہا کہ سیلاب سے متاثرہ خاندانوں کو فی کس 25 ہزار روپے فراہم کیے جا رہے ہیں، سیلاب متاثرین کی ہر ممکن امداد کے لیے تیار ہیں، آپ لوگوں کو بہت تکلیف پہنچی ہے، آپ نے بہت مشکلات کا سامنا کیا ہے۔ مجھے بتایا گیا ہے کہ صوبہ خیبرپختونخوا میں 242 افراد جاں بحق ہوئے ہیں، جو لوگ جاں بحق ہوئے ہیں ان کے لواحقین کو فی کس دس لاکھ روپے فراہم کیے جا رہے ہیں۔

وزیراعظم شہباز شریف نے کہا کہ چاروں صوبوں میں امدادی پروگرام جاری ہے، سندھ و بلوچستان کے دورے کیے ہیں، سیلاب نے بڑی تباہی پھیلائی ہے، سندھ کیلئے ہم نے 15 ارب روپے کی گرانٹ دی ہے، بلوچستان کیلئے 140 ارب روپے کی گرانٹ دی ہے، این ڈی ایم اے اور صوبوں کے ساتھ مل کر کام کریں گے۔جب تک آپ اپنے گھروں میں آباد نہیں ہوتے چین سے نہیں بیٹھیں گے، آپ فکر نہ کریں، ہم سب مل کر اس مشکل وقت کا مقابلہ کریں گے، مشکل کی اس گھڑی میں وفاقی حکومت خیبرپختونخوا حکومت کے ساتھ ہے۔

اس موقع پر سیلاب متاثرین نے وزیراعظم شہباز شریف سے کہا کہ آپ پہلے خادم پنجاب تھے اب خادم پاکستان ہیں۔