عمران خان نے مشترکہ طور پر آرمی چیف لگانے کی پیشکش کی، شہباز شریف

لاہور : وزیراعظم شہباز شریف نے کہا ہے کہ عمران خان نے مشترکہ طور پر آرمی چیف لگانے کی پیشکش کی، عمران خان نے ایک مہینہ پہلا مذاکرات کی پیشکش کی، عمران خان عام انتخابات کی تاریخ طے کرنا اور آرمی چیف کی تقرری چاہتے تھے۔
وزیراعظم شہباز شریف کی لاہور میں سوشل میڈیا سے منسلک افراد سے ملاقات ہوئی جس میں لانگ مارچ اور ملکی سیاسی معاشی صورتحال پر وزیراعظم نے گفتگو کی۔وزیراعظم نے لانگ مارچ کو بلاجواز اور پاکستان کی ترقی کیخلاف قرار دیتے ہوئے کہا کہ عمران خان نے مشترکہ طور پر آرمی چیف لگانے کی پیشکش ایک مہینہ پہلے کی تھی، ان کی دو مطالبات تھے، عمران خان عام انتخابات کی تاریخ طے کرنا اور آرمی چیف کی تقرری چاہتے تھے، عمران خان نے کہا کہ 3 نام میں بھجواتا ہوں اور 3 نام آپ بھجوائیں اور نیا آرمی چیف منتخب کرتے ہیں،وزیراعظم نے کہا کہ آرمی چیف کی تقرری آئین اور قانون کے مطابق ہی ہو گی ،عمران خان نے مشترکہ کاروباری دوست کے ذریعے رابطہ کیا۔ میں عمران خان کی درخواست ٹھکرائی تاہم میثاق جمہوریت اور میثاق معیشت کی پیشکش کی۔
وزیراعظم شہباز شریف کی زیر صدارت لانگ مارچ سے متعلق بھی اجلاس ہوا جس میں وزیراعظم کو لانگ مارچ کے شرکاء کی تعداد، علی آمین گنڈہ پور کے پلان سے بھی آگاہ کیاگیا۔ وزیراعظم کا کہنا تھا کہ کسی کو قانون ہاتھ میں نہیں لینے دیا جائے گاْ وزیراعظم نے امن و امان برقرار رکھنے کیلیے اقدامات کی بھی ہدایت کی ۔
وزیراعظم نے دورہ چین سے متعلق اجلاس کی بھی صدارت کی، اجلاس میں چین دورے کے حوالے سے تیاریوں پر پلانگ ڈویژن، خارجہ امور اور خزانہ ڈویژنز کو ہدایات جاری کی گئی۔