اسلام آباد میں بلا اجازت احتجاج پرسخت کریک ڈائون کی تیاری

اسلام آباد میں بلا اجازت احتجاج پر کارروائی ہوگی۔پولیس نے واضح کر دیا۔ایک بیان میں اسلام آباد پولیس کے ترجمان کا کہنا ہے کہ جن سیاسی کارکنوں کی شناخت کی جاچکی ہے اورمقدمات درج ہیں۔ان کی گرفتاری کے لیے اسلام آباد کیپیٹل پولیس کارروائی کررہی ہے۔اسلام آباد ایئرپورٹ سے آنے والے مہمانوں کےلیے راستے کھلے رکھے جائیں گے۔

ترجمان اسلام آباد پولیس کے مطابق ایک سیاسی جماعت کے رہنمائوں نے اسلام آباد آمد و رفت کے راستے مسدود کرنے کا اعلان کیا ہے۔اسلام آباد کے شہریوں ، طلباء اور مریضوں کو مشکلات کا سامنا کرنا پڑ سکتا ہے۔سفر شروع کرنے سے پہلے شاہراہوں کی تازہ ترین صورتحال جاننے کےلئے پکار 15 پر کال کریں۔

ترجمان پولیس کا کہنا ہے کہ ایئر پورٹ کےلیے بلا رکاوٹ آمد و رفت قومی تشخص کےلیے اہمیت کی حامل ہے۔وفاقی قانون نافذ کرنے والے ادارے ایئرپورٹ اور موٹر وے تک آمد و رفت کے راستوں کی نگرانی کریں گے۔تمام سیاسی احباب سے گزارش ہے کہ انتظامیہ سے اجازت کے ساتھ مختص مقام پر احتجاج کریں۔