الوداع جنرل باجوہ! جنرل عاصم منیرنے 17 ویں آرمی چیف کی کمان سنبھال لی

راولپنڈی : آرمی چیف کے عہدے سے سبکدوش ہونے والے جنرل قمر جاوید باجوہ نے نئے آرمی چیف جنرل عاصم منیر کو پاک فوج کی کمان سونپ دی جس کے بعد وہ پاک فوج کے 17 ویں سربراہ بن گئے ہیں۔ جی ایچ کیو میں ہونے والی پروقار تقریب میں جنرل قمر جاوید باجوہ کو الوداعی گارڈ آف بھی آنر پیش کیا گیا۔

جی ایچ کیو راولپنڈی میں پاک فوج کی کمان کی تبدیلی کی پروقار تقریب ہوئی۔ تقریب کے آغاز میں پاک فوج کے سبکدوش ہونے والے سربراہ جنرل قمر جاوید باجوہ اور نئے آرمی چیف جنرل عاصم منیر نے پہلے یادگار شہدا پر حاضری دی۔ جہاں انہوں نے یادگار شہدا پر پھول چڑھائے اور شہدا کے بلند درجات کے لیے دعا کی۔

اس کے بعد پاک فوج کے بینڈز نے قومی ترانے اور ملی نغموں کی دھنیں پیش کیں اور قومی پرچم کو سلامی دی گئی۔ مہمان خصوصی جنرل قمر جاوید باجوہ کی جنرل عاصم منیر کے ہمراہ تقریب آمد پر انہیں سلامی دی گئی۔ تلاوت کلامِ پاک سے تقریب کا آغاز کیا گیا۔ جس کے بعد جنرل قمر جاوید باجوہ کو الوداعی گارڈ آف آنر پیش کیا گیا۔

سبکدوش ہونے والے آرمی چیف جنرل قمر جاوید باجوہ نےآرمی کمان کی علامت سمجھی جانے والی ملاکا اسٹک اعزازی شمشیر یافتہ جنرل سید عاصم منیرکےحوالے کی اور انہیں گلے لگاکر مبارکباد دی۔فوج کی کمانڈ سنبھالنے کے بعد جنرل عاصم منیر کو ارڈ آف آنر پیش کیا گیا۔

کمان تبدیلی کی تقریب میں نئے آرمی چیف جنرل عاصم منیر فور اسٹار جنرل کے شولڈر رینکس اور کالر میڈل لگائے شریک رہے۔ اہم تقریب میں چیئرمین جوائنٹ چیفس آف اسٹاف کمیٹی، مسلح افواج کے سربراہان، سینئرحاضرسروس اورریٹائرڈفوجی افسران ان کی فیملیزکے علاوہ، وزیراعلی پنجاب، وفاقی وزراء نے بھی شرکت کی۔