اسمبلیاں کب تحلیل ہوں گی؟ فیصلہ اگلے ہفتے ہوگا، فواد چودھری

دینہ: پاکستان تحریک انصاف کے ہیڈ آف میڈیا افیئرز فواد چودھری نے کہا ہے کہ آئندہ ہفتے فیصلہ ہو گا کہ اسمبلیاں کب تحلیل کریں گے؟

فواد چودھری نے دینہ منگلا بائی پاس روڈ کا افتتاح کرنے کے بعد ذرائع ابلاغ سے بات چیت کرتے ہوئے کہا کہ 20 مارچ سے پہلے الیکشن ہو جائیں گے، اس وقت حکومت بوکھلاہٹ کا شکار ہے۔

سابق وفاقی وزیر فواد چودھری نے کہا کہ 12.83 کلو میٹر روڈ ایک ارب 13 کروڑ کی لاگت سے تیارہوا ہے جو علاقے کے عوام کو سفری سہولتیں فراہم کرے گا۔

سابق وفاقی وزیر اطلاعات ںے کہا کہ پہلے یہ کہتے تھے کہ الیکشن چاہتے ہیں تو صوبائی اسمبلیاں توڑیں، جب ہم نے اسمبلیاں توڑنے کا فیصلہ کیا تو ان کے بیانات بدل گئے۔

فواد چودھری نے دعویٰ کیا کہ پاکستان تحریک انصاف صوبہ پنجاب اور خیبرپختونخوا میں دو تہائی اکثریت سے حکومت بنائے گی۔پاکستان میں طاقتور لوگ قانون سے بالا تر ہیں، جب تک طاقتور قانون کے نیچے نہیں آئیں گے ہم ترقی نہیں کر سکتے ہیں۔