دہشتگردی کی عفریت کو جڑسے ختم کیا جائے گا، وفاقی کابینہ

اسلام آباد : وفاقی کابینہ کا کہنا ہے کہ ملک میں امن و امان کی صورتحال پر کسی قسم کا سمجھوتہ نہیں کیا جائے گا۔دہشتگردی کی عفریت کو جڑ سے ختم کر دیا جائے گا۔اجلاس میں دہشتگردی کے واقعات کی شدید مذمت کی گئی۔شرکا نے ن لیگ کے ایم این اے چوہدری اشرف کی گرفتاری پر افسوس کا اظہار بھی کیا۔وزیراعظم نے سرکاری دفاتر میں بجلی کی کھپت کو 30 فیصد کم کرنے کے حوالے سے کمیٹی بنانے کی ہدایت کردی۔

وزیراعظم شہباز شریف کی زیر صدارت وفاقی کابینہ کا اجلاس ہوا۔اجلاس میں دہشتگردی واقعات میں شہید افراد کے لیے فاتحہ خوانی کی گئی۔وفاقی کابینہ نے دہشتگردی کیخلاف مسلسل جدوجہد پرسیکیورٹی فورسز کو خراج تحسین پیش کیا۔

اجلاس میں پاور ڈویژن کی جانب سے پیش کیے گئے توانائی بچت پلان پر بحث کی گئی۔اجلاس کوتوانائی بچت پلان کے حوالے سے اسٹیک ہولڈرز کیساتھ ہوئی مشاورت پر بریفنگ دی گئی۔وزیراعظم کا کہنا تھا کہ توانائی بچت پلان کے نفاذ کیلئے تمام اسٹیک ہولڈرز کیساتھ مشاورت کے عمل کو جلد از جلد مکمل کیا جائے۔بحیثیت قوم توانائی کے حوالے سے کفایت شعاری اپنانے کی اشد ضرورت ہے۔ایندھن کی مد میں امپورٹ بل میں کمی کیلئے توانائی بچت پلان پر عمل درآمد ناگزیر ہے۔

وزیراعظم نے ونڈ پاور کی استعدادکار کے حوالے سے تفصیلی رپورٹ پیش کرنے کی بھی ہدایت کی۔کابینہ کو بریفنگ میں بتایا گیا کہ پیٹرول سے چلنے والی موٹر سائیکلوں کو مرحلہ وار الیکٹرک بائیکس سے تبدیل کیا جائے گا۔اس وقت پاکستان میں 90 کمپنیاں موٹر سائیکلز اور آٹو رکشاز بنا رہی ہیں۔ملک میں سالانہ 6 ملین موٹر سائیکلز بنانے کی صلاحیت موجود ہے۔بائیس کمپنیوں کو الیکٹرک بائیکس بنانے کے لائسنس جاری کیے جاچکے ہیں۔پاکستان میں الیکٹرک بائیکس کے فروغ سے ایندھن کی مد میں خاطرخواہ بچت ہوگی۔ماحول دوست الیکٹرک بائیکس کاربن کے اخراج میں کمی کا باعث بھی بنیں گی۔