محسن نقوی پنجاب کے نگران وزیراعلیٰ ،الیکشن کمیشن کا نوٹیفکیشن جاری

اسلام آباد : چیف الیکشن کمشنر سکندر سلطان راجہ کی زیر صدارت اجلاس میں نجی میڈیا گروپ کے مالک اور سینئر صحافی محسن نقوی کو نگران وزیراعلیٰ پنجاب مقرر کردیا گیا۔اجلاس میں سیکرٹری الیکشن کمیشن اور دیگر ارکان شریک ہوئے۔اجلاس میں نگران وزیراعلیٰ کے ناموں پر غور کیا گیا۔

الیکشن کمیشن کے اجلاس میں محسن نقوی کی بطور نگران وزیر اعلیٰ تقرری کا فیصلہ اتفاق رائے سے کیا گیا۔الیکشن کمیشن نے محسن نقوی کی بطور نگران وزیر اعلیٰ پنجاب تقرری کا نوٹیفکیشن بھی جاری کر دیا۔ الیکشن کمیشن کے اعلامیے کے مطابق نگران وزیراعلیٰ کی حلف برداری کیلئے گورنر پنجاب کو خط لکھ دیا گیا ہے۔

حکومت کی جانب سے احمد نواز سکھیرا اور نوید اکرم چیمہ کے نام نگران وزیراعلیٰ پنجاب کیلئے تجویز کیے گئے تھے جبکہ اپوزیشن نے محسن رضا نقوی اور احد چیمہ کے نام دیئے تھے۔پنجاب حکومت اور اپوزیشن کی جانب سے نگران وزیراعلیٰ کے نام پر اتفاق رائے نہ ہونے کے بعد معاملہ آئین کے مطابق الیکشن کمیشن کو بھیجا گیا تھا اور الیکشن کمیشن کو بھی آج رات 10 بجے تک فیصلہ کرنا تھا۔