چودھری شجاعت حسین مسلم لیگ ق کے صدر برقرار

اسلام آباد : الیکشن کمیشن آف پاکستان کی جانب سے چودھری شجاعت حسین کے مسلم لیگ ق کے صدر ہونے یا نہ ہونے سے متعلق فیصلہ سنا دیا گیا، چودھری شجاعت حسین پارٹی کے صدر برقرار رہیں گے۔

چیف الیکشن کمشنر کی سربراہی میں تین رکنی کمیشن نے چودھری شجاعت حسین کو پارٹی صدارت سے ہٹانے سے متعلق کیس کا محفوظ شدہ فیصلہ سنا دیا۔ الیکشن کمیشن نے مسلم لیگ ق چودھری شجاعت حسین کی درخواست منظور کر لی اور انہیں پارٹی صدر برقرار رکھا ہے۔

الیکشن کمیشن نے گزشتہ برس اگست میں فیصلہ محفوظ کیا تھا، چودھری شجاعت نے پارٹی صدارت سے ہٹانے کے خلاف الیکشن کمیشن کو درخواست دی تھی۔الیکشن کمیشن نے حکم امتناع پر چودھری شجاعت حسین کو بحال کیا تھا۔

چند روز قبل مسلم لیگ ق کے صدر چودھری شجاعت حسین کو پارٹی صدارت سے ہٹا دیا گیا تھا۔ مسلم لیگ ہاؤس ڈیوس روڈ میں ق لیگ کے مشاورتی اجلاس کے دوران چودھری شجاعت حسین کو پارٹی کی صدارت سے ہٹانے کا فیصلہ کیا گیا جبکہ ان کی جگہ ان کے بھائی چودھری وجاہت حسین کو ق لیگ کا صدر مقرر کیا گیا تھا۔

اس کے علاوہ طارق بشیر چیمہ کو ہٹاکر کامل علی آغا کو پارٹی کا مرکزی سیکرٹری جنرل بنایا گیا۔