فل کورٹ بن جاتا تو کون اختلاف کرتا؟قانون خود پربھی لاگوکریں، وزیراعظم

اسلام آباد : وزیر اعظم شہبازشریف کا کہنا ہے کہ جو قانون کسی اور کیلئے بنائیں اپنے اوپر بھی لاگو کریں۔

وزیراعظم شہباز شریف نے لائرز کمپلیکس اسلام آباد میں خطاب کرتے ہوئے کہا کہ 9 ججوں کا بینچ بنا جو 3 ججز پر رہ گیا، فل کورٹ کامطالبہ مان لیا جاتا تو کون اس کےفیصلے سے اختلاف کرتا؟۔ وکلا کا تعلق قانون کی حکمرانی کیلئے قربانیاں دینے والے طبقے سےہے، وکلا نے جو مقام حاصل کیا وہ پلیٹ میں رکھ کر نہیں دیاگیا، وکلا نےعدلیہ کی بحالی کیلئے قربانیاں دیں، لائرز کمپلیکس میں اسپورٹس کمپلیکس بھی بنایا جائے، اسپورٹس کمپلیکس نہیں ہوگا تو لائرز کمپلیکس بھی نہیں ہوگا، منصوبے کیلئے رقم کہاں سے آئے گی، میں آپ کو کان میں بتادوں گا، لائرز کمپلیکس کی تعمیر  پر  ایک ارب 80 کروڑ روپے لاگت آئے گی۔

وزیراعظم شہباز شریف  نے کہا کہ آپ نے عدلیہ کی بحالی کیلئے ڈنڈے کھائے، گولیاں کھائیں، ہمیں حکم دیا جاتا ہے وزیراعظم اکیلا کچھ نہیں کابینہ ہے، جنہوں نے یہ حکم دیا وہ اپنے اوپر کیوں لاگو نہیں کرتے؟ نظریہ ضرورت نے پاکستان کو کہاں پہنچا دیا ہے؟ ججز اور عدلیہ کا ہم سب کو احترام کرنا چاہیے، جو قانون کسی اور کیلئے بنائیں اپنے اوپر بھی لاگو کریں۔ کوئی سیاسی جماعت الیکشن سے نہیں بھاگ سکتی، جو پارٹی الیکشن سے بھاگے گی اس کی سیاست اسی دن دفن ہوجائے گی۔قانون کو بڑی ڈھٹائی سے ری رائٹ کیا گیا، ہم سب کو اپنے گریبان میں جھانکنا ہوگا۔

شہباز شریف کا کہنا تھا کہ لائرز کمپلیکس میں خواتین اور مردوں کیلیے اسپورٹس کمپلیکس ہونا چاہیے، اسپورٹس کمپلیکس میں خواتین ومردوں کے لیے سوئمنگ پول بھی بنایا جائے، لائرز کمپلیکس اسپورٹس کمپلیکس کے بنا ادھورا ہے۔شہباز شریف نے کہا ہے کہ لائرز کمپلیکس کے لیے 1.8 ارب روپے کے فنڈز رکھے گئے ہیں، کا ش! اس رقم کا یہاں پر اعلان نہ کیا جاتا۔