پنجاب حکومت کا شاہد خاقان عباسی سے معافی مانگنے کا مطالبہ

لاہور : پنجاب حکومت نے سابق وزیراعظم شاہد خاقان عباسی کے الزام پر سخت ردعمل کا اظہار کیاہے۔
نگران وزیر اطلاعات پنجاب عامر میر نے شاہد خاقان عباسی کے الزام کا جواب دیتے ہوئے کہا ہے کہ مفت آٹا سکیم میں ایک پائی کی بھی کرپشن نہیں ہوئی۔ الزام لگانے والوں کی اپنی ساکھ مجروح ہوئی ہے۔ آٹا اسکیم پنجاب کی تاریخ کی کامیاب ترین سکیم رہی۔ اسکیم سے پنجاب کے 3 کروڑ مستحق لوگوں نے فائدہ اٹھایا۔ آٹا اسکیم کو وفاقی اور پنجاب حکومت کی طرف سے مل کر فنڈ کیا گیا۔
نگران وزیر اطلاعات عامر میر کا کہنا تھا کہ آٹا اسکیم کو پارٹی کی اندرونی سیاست کی بھینٹ چڑھانا سراسر زیادتی ہے۔ شاہد خاقان عباسی معذرت کریں یا ثبوت مہیا کریں۔ پنجاب حکومت پر کوئی کرپشن کا الزام نہیں لگا سکتا۔ پنجاب حکومت ایک ایک پائی کا حساب دے سکتی ہے۔
گزشتہ روز سابق وزیر اعظم اور ن لیگ کے سینئر رہنما شاہد خاقان عباسی نے مفت آٹا اسکیم کے حوالے سے بڑا انکشاف کیا تھا کہ آٹا تقسیم کی مد میں 20 ارب روپے سے زائد کی چوری ہوئی، سیاسی دشمنی نفرت میں بدل گئی ہے، بدقسمتی سے سب تماشائی بنے بیٹھے ہیں۔ ہمیں تسلیم کرنا ہوگا کہ ملکی معاملات مشکل میں ہیں۔