اسرائیل کیجانب سے فلسطینی امدادی ایجنسی کے سربراہ کو غزہ میں داخلے کی اجازت نہ مل سکی

اقوام متحدہ کی فلسطینی پناہ گزین ایجنسی (UNRWA) اور مصری وزیر خارجہ نے کہا ہے کہ اسرائیلی حکام نے پیر کے روز ادارے کے سربراہ کو غزہ کی پٹی میں داخلے کی اجازت دینے سے انکار کر دیا۔ انہوں نے اسے ایک ایسا اقدام قرار دیا جس کی کوئی مثال موجود نہیں ہے۔

فلسطینی پناہ گزین ایجنسی،یو این آر ڈبلیو کے سربراہ فلپ لازارینی نے قاہرہ میں مصری وزیر خارجہ سامح شکری کے ساتھ ایک نیوز کانفرنس میں گفتگو کرتے ہوئے کہا کہ ان کا پیر کو رفح جانے کا ارادہ تھا، “لیکن مجھے ایک گھنٹہ پہلے اطلاع ملی ہے کہ مجھے رفح میں داخل ہونے سے روک دیا گیا ہے۔”

شکری نے لازرینی سے کہا، “اسرائیلی حکومت نے آپ کے داخلے سے انکار کیا جو اس اعلیٰ عہدے کے نمائندے کے لیے ایک ایسا اقدام ہے جس کی اس سے قبل کوئی مثال موجود نہیں ہے”۔

فلسطینی مہاجرین کے لیے اقوام متحدہ کا ادارہ۔ یو این آر ڈبلیو اے، جسے 1949 میں قائم کیا گیا تھا، فلسطینی مہاجرین کو امداد اور ضروری خدمات فراہم کرتا ہے اور غزہ میں اس طرح کی امداد فراہم کرنے والا یہ سب سے بڑا ادارہ ہے۔

لازارینی کو علاقے میں داخل ہونے کی اجازت سے انکار کرنے کا اقدام ایسے وقت میں سامنے آیا ہے جب غزہ میں فلسطینیوں کو ایک بڑھتے ہوئے انسانی بحران کا سامنا ہے، اور اقوام متحدہ کی ایک رپورٹ میں پیر کے روز کہا گیا ہے کہ غزہ کے شمال میں اس وقت اور مئی کے درمیان قحط کا خدشہ ہے۔

مزید خبروں کیلئے وزٹ کریں