نمل میں پاکستان ریڈ کریسنٹ کے تعاون سے ڈیزاسٹر مینجمنٹ کے متعلق سیمینار کا انعقاد

نیشنل یونیورسٹی آف ماڈرن لینگویجز کے شعبہ ٹرانسلیشن اینڈ انٹرپریٹیشن نے پاکستان ریڈ کریسنٹ کے تعاون سے “ڈیزاسٹر مینجمنٹ” کے موضوع پر سیمینار کا انعقاد کیا۔ اس سیمینار کا مقصد طلباء کو ہنگامی حالات اور آفات سے نمٹنے کے لیے ضروری علم اور عملی مہارتوں سے آراستہ کرنا اور آفات کیلئے تیاری کے کلچر کو فروغ دینا تھا۔

نمل کے سابق طالب علم اور پاکستان ریڈ کریسنٹ کے اسسٹنٹ ڈائریکٹر برائے ڈیزاسٹر پریپیئرڈنس، محمد ابراہیم نے اپنی ٹیم کے ساتھ عملی تربیتی سیشن منعقد کیا۔ اس سیشن میں فرسٹ ایڈ تکنیکوں اور آفات سے نمٹنے کے طریقوں پر توجہ مرکوز کی گئی، جس میں ہنگامی حالات میں زندگی بچانے کے لیے اہم اقدامات کا مظاہرہ کیا گیا۔ انہوں نے آفات سے تیاری کی اہمیت پر روشنی ڈالی اور بتایا کہ بروقت اقدامات کس طرح جانیں بچا سکتے ہیں۔

سیمینار میں طلباء کو مختلف اقسام کی آفات سے متعلق آگاہی فراہم کی گئی اور مؤثر ردعمل کی تکنیکیں سکھائی گئیں۔ فرسٹ ایڈ اور ڈیزاسٹر مینجمنٹ کے حوالے سے شعور اجاگر کرنے کے ذریعے یہ سیشن کمیونٹی کی شمولیت اور سماجی ذمہ داری کی حوصلہ افزائی کرتا ہے، تاکہ طلباء ہنگامی حالات میں دوسروں کی مدد کرنے کے لیے بہتر طور پر تیار ہوں۔

شعبہ ٹرانسلیشن اینڈ انٹرپریٹیشن کی سربراہ، محترمہ حنا شہاب نے فرسٹ ایڈ سروس کی اہمیت پر بات کی اور معاشرے میں مثبت اور انسانی کردار ادا کرنے پر زور دیا۔ انہوں نے کہا کہ کمیونٹی سروس سے فرد کی ذاتی ترقی اور سماجی فلاح و بہبود میں اضافہ ہوتا ہے۔

طلباء نے اس سیمینار میں گہری دلچسپی ظاہر کی، سیشن میں بھرپور شرکت کی اور ماہرین سے فرسٹ ایڈ اور آفات کی تیاری سے متعلق سوالات پوچھے۔

پاکستان ریڈ کریسنٹ نمل کے طلباء کو پیشہ ورانہ فرسٹ ایڈ کی تربیت فراہم کرے گا، جس کے اختتام پر طلباء کو اسناد دی جائیں گی جو انہیں ہنگامی حالات میں فرسٹ ایڈ کی خدمات فراہم کرنے کے قابل بنائیں گی۔