آصفہ بھٹو زرداری کا ترک صدر رجب طیب اردوان کی گاڑی ڈرائیو کرنا ناقابل فراموش لمحہ

پاکستان کی خاتون اول آصفہ بھٹو زرداری نے ترک صدر رجب طیب اردوان کی گاڑی چلانے کو ایک یادگار لمحہ قرار دیا ہے۔

فوٹو اینڈ ویڈیو شیئرنگ پلیٹ فارم انسٹاگرام پر آصفہ بھٹو زرداری نے اس خاص لمحے کی ویڈیو شیئر کی اور اپنے جذبات کا اظہار کیا۔ ویڈیو میں دیکھا جا سکتا ہے کہ آصفہ بھٹو زرداری گاڑی چلا رہی ہیں، ترک صدر رجب طیب اردوان ان کے ساتھ اگلی نشست پر بیٹھے ہیں، جبکہ صدرِ مملکت آصف علی زرداری پچھلی نشست پر موجود ہیں۔

اپنی انسٹاگرام پوسٹ میں آصفہ بھٹو زرداری نے لکھا:
“صدر طیب اردوان کے دورۂ پاکستان کے موقع پر ان کی گاڑی چلانا ایک یادگار لمحہ ہے۔ ڈرائیونگ سیٹ پر 2 صدور کے ساتھ یہ لمحہ کبھی نہیں بھول سکتی۔”

یہ ویڈیو ترک صدر رجب طیب اردوان کے حالیہ دورۂ پاکستان کے دوران بنائی گئی، جب انہوں نے ایک الیکٹرک گاڑی صدرِ مملکت آصف علی زرداری کو تحفے میں دی تھی۔