“سابقہ حکومت نے عوام کو اندھیروں میں دھکیلا” – وزیر اطلاعات کی تنقید

وزیرآباد: وفاقی وزیر اطلاعات عطاء اللہ تارڑ نے وزیرآباد کا دورہ کیا، جہاں گکھڑ پہنچنے پر ان کا شاندار استقبال کیا گیا۔ ان پر پھولوں کی پتیاں نچھاور کی گئیں اور نوٹوں کی برسات بھی کی گئی۔ انہیں بگھی میں بٹھا کر ان کے آبائی علاقے پیر کوٹ لے جایا گیا۔

“مسلم لیگ (ن) عوامی خدمت کی علامت ہے”

کارکنوں سے خطاب میں عطاء اللہ تارڑ نے کہا کہ آج پورا پاکستان مسلم لیگ (ن) کی قیادت سے خوش ہے۔ انہوں نے دعویٰ کیا کہ سابقہ حکومت نے عوام کو اندھیروں میں دھکیلا، جبکہ مسلم لیگ (ن) نے ہمیشہ تعمیر و ترقی کو ترجیح دی۔

انہوں نے کہا، “وزیرآباد، گکھڑ کا مجھ پر قرض ہے، میں اسی علاقے کی بدولت پہچانا جاتا ہوں، اور آج اسے چکانے آیا ہوں۔ آپ جی ٹی روڈ کا کوئی بھی حصہ دیکھ لیں، ہر جگہ ترقیاتی کام نظر آئیں گے۔ حکومتی اقدامات کی بدولت معیشت درست سمت میں جا رہی ہے، اور مسلم لیگ (ن) نے ہمیشہ عوام کی خدمت کی ہے۔ نواز شریف کی قیادت میں ملک کو ہمیشہ بحرانوں سے نکالا گیا ہے۔”

“ہم نے ملک کو دیوالیہ ہونے سے بچایا”

وفاقی وزیر اطلاعات نے دعویٰ کیا کہ حکومت نے پاکستان کو دیوالیہ ہونے سے بچا لیا۔ انہوں نے کہا کہ عالمی مالیاتی ادارے آج پاکستان کی معیشت کی بہتری کا اعتراف کر رہے ہیں۔ وزیر اعظم شہباز شریف کی قیادت میں معیشت مستحکم ہو رہی ہے۔

“بانی پی ٹی آئی نے 190 ملین پاؤنڈ کی ڈکیتی کی”

عطاء اللہ تارڑ نے پی ٹی آئی پر شدید تنقید کرتے ہوئے کہا کہ بانی پی ٹی آئی نے 190 ملین پاؤنڈ کی ڈکیتی کی اور ملک کو ناقابلِ تلافی نقصان پہنچایا۔ “یہ وہ لوگ تھے جنہوں نے پاکستان کی بہتری کے لیے ایک اینٹ بھی نہیں لگائی۔”

انہوں نے مزید کہا کہ پی ٹی آئی کی سیاست ہمیشہ نفرت، انتشار اور لوٹ مار پر مبنی رہی ہے۔ “ہم 28 مئی والے ہیں، 9 مئی والے نہیں۔ آج پی ٹی آئی دس حصوں میں بٹ چکی ہے، اور اس جماعت کا وجود ماضی کا حصہ بننے والا ہے۔”

حکومتی ترقیاتی منصوبے اور مستقبل کے اہداف

عطاء اللہ تارڑ نے کہا کہ موجودہ حکومت ملک کو ترقی کی راہ پر گامزن رکھنے کے لیے کوشاں ہے اور آئندہ بھی عوامی خدمت جاری رہے گی۔