عوام کو صحت اور علاج معالجے کی بہترین سہولتیں فراہم کرنے کیلئے پرعزم ہیں:مریم نواز

وزیراعلیٰ پنجاب مریم نواز شریف نے عالمی یوم صحت کے موقع پر اپنے پیغام میں کہا ہے کہ پنجاب حکومت عوام کو صحت اور علاج معالجے کی بہترین سہولتیں فراہم کرنے کیلئے پرعزم ہے۔ انہوں نے کہا کہ فیلڈ ہسپتالوں کے ذریعے لاکھوں مریضوں کو محض چند ماہ میں ان کے گھروں کی دہلیز پر علاج فراہم کیا جا رہا ہے، جو صحت عامہ کے شعبے میں انقلابی قدم ہے۔

جدید ہیلتھ کلینکس اور ادویات کی فراہمی

مریم نواز نے بتایا کہ پنجاب میں پہلی بار 1250 مراکز صحت کو جدید ترین کلینکس میں تبدیل کیا جا رہا ہے۔ ان کلینکس میں عوام کو بنیادی مراکز صحت کی نسبت بہتر اور معیاری طبی سہولیات فراہم کی جا رہی ہیں۔ انہوں نے کہا کہ اب عوام کو ان کی رہائش گاہوں پر ادویات کی فراہمی بھی یقینی بنائی جا رہی ہے، جو ایک منفرد اور قابل تقلید ماڈل ہے۔

بڑے ہسپتالوں میں طبی سہولتوں کی بہتری

وزیراعلیٰ پنجاب نے کہا کہ بڑے سرکاری ہسپتالوں میں علاج، ٹیسٹ اور ادویات کی فراہمی کیلئے بھرپور اقدامات کیے جا رہے ہیں۔ انہوں نے انکشاف کیا کہ پنجاب میں پاکستان کا پہلا سرکاری کینسر ہسپتال اور سرگودھا میں کارڈیالوجی انسٹیٹیوٹ جلد فعال کیے جائیں گے، جو جدید طبی نظام کی جانب بڑا قدم ہے۔

ایمرجنسی کے لیے ایئر ایمبولینس سروس

مریم نواز شریف نے بتایا کہ دور دراز اور پسماندہ علاقوں سے ایمرجنسی مریضوں کو فوری طور پر بڑے شہروں میں منتقل کرنے کیلئے ایئر ایمبولینس سروس کا آغاز کر دیا گیا ہے، جو کہ ایک غیر معمولی اقدام ہے۔ اس کے ساتھ ساتھ چیف منسٹر چلڈرن ہارٹ سرجری پروگرام اور ٹرانسپلانٹ کارڈ بھی متعارف کرائے گئے ہیں۔

2025 کا تھیم: زچہ و بچہ کی صحت

انہوں نے کہا کہ 2025 کے عالمی یوم صحت کا تھیم “صحت مند آغاز، پر امید مستقبل” ہے، جو زچہ و بچہ کی صحت اور سلامتی پر مرکوز ہے۔ انہوں نے کہا کہ نہ صرف علاج کی سہولتیں بلکہ صحت مند طرز زندگی کے بارے میں شعور اجاگر کرنا بھی اہم ہے۔

صحت مند معاشرہ ہی خوشحال مستقبل کی ضمانت

مریم نواز کا کہنا تھا کہ ایک صحت مند آبادی ہی ایک پرامن، خوشحال اور ترقی یافتہ معاشرے کی بنیاد ہے۔ عالمی یوم صحت ہمیں یاد دلاتا ہے کہ اچھی صحت کی حفاظت اور بہتری کیلئے روزمرہ زندگی میں مثبت تبدیلیاں ناگزیر ہیں۔