عمران خان سے اہلخانہ، وکلاء کی جیل میں ملاقاتیں۔۔ بیٹوں سے واٹس ایپ کال پر بات

راولپنڈی سینٹرل جیل میں بانی تحریک انصاف عمران خان سے اہلخانہ، وکلاء ٹیم کی ملاقات جب کہ سابق وزیراعظم کی ان کے بیٹوں سے واٹس ایپ پر بات کروائی گئی۔

جیل ذرائع کا کہنا ہے کہ منگل کو بانی پی ٹی آئی اور اہلیہ کی فیملی ممبرز اور وکلاء سے ملاقات کروائی گئی، اہلخانہ کے افراد میں مہرالنساء اور مبشرہ شامل تھیں، جب کہ بیرسٹر علی ظفر بیرسٹر گوہر علی خان، ظہیر عباس ایڈوکیٹ، مبشر مقصود ایڈوکیٹ، رضیہ سلطان ایڈوکیٹ، علی عمران ایڈوکیٹ کی بھی بانی پی ٹی آئی سےملاقات کرائی گی۔

ذرائع نے اس بات کی بھی  تصدیق کی ہے کہ سابق وزیراعظم سے ان کے لندن میں مقیم بچوں قاسم خان، سلیمان خان سے وٹس اپ کال پر بات کرائی گی، سنٹرل جیل راولپنڈی میں قید بانی تحریک انصاف اور ان کی اہلیہ سے یہ ملاقاتیں معمول کے مطابق اور باقاعدگی سے حسب ضابطہ کروائی جا رہی ہیں۔

 چند عناصر کی طرف سے ملاقات نہ کروائے جانے کا جھوٹا اور بے بنیاد پراپیگنڈہ محض سیاسی پوائنٹ سکورنگ ہے، جس کا حقیقت سے کوئی تعلق نہیں، یہ عناصر میڈیا کوریج حاصل کرنے اور خبروں کی سرخیوں میں رہنے کے لئے ایسے ہتھکنڈے اپنا رہے ہیں، جیل ذرائع نے ایسے گمراہ کن اور اس نوعیت کی بے بنیاد خبروں کی بھر پور تردید کی ہے۔