بھارتی میڈیا کے جھوٹے دعوے بے نقاب، پاکستان نے شاہین میزائل کے استعمال کی تردید کر دی : دفتر خارجہ کا دوٹوک ردعمل

اسلام آباد: بھارتی میڈیا کی جانب سے شاہین میزائل کے استعمال سے متعلق بے بنیاد دعوؤں پر پاکستان کے دفتر خارجہ نے سخت ردعمل دیتے ہوئے کہا ہے کہ بھارتی فوج نے خود اپنی جاری کردہ ویڈیو کو ڈیلیٹ کر کے اپنی شکست کا اعتراف کر لیا ہے۔ بعض بھارتی میڈیا ادارے تاحال گمراہ کن بیانیہ پھیلا رہے ہیں، جو کہ ان کی بوکھلاہٹ کا ثبوت ہے۔

ترجمان دفتر خارجہ نے وضاحت کی کہ پاکستان نے حالیہ آپریشن بنیان مرصوص کے دوران شاہین میزائل کا استعمال نہیں کیا بلکہ جدید ٹیکنالوجی سے لیس فتح F1 اور F2 میزائلز، گائیڈڈ آرٹلری، ڈرونز، اور طویل فاصلے تک مار کرنے والے توپ خانے کا استعمال کیا گیا۔

دفتر خارجہ کے مطابق بھارتی فوج کی خاموشی اس کی شکست کی علامت ہے، اور بھارتی میڈیا کی طرف سے پھیلائی جانے والی یہ گمراہ کن مہم دراصل بھارت کی آپریشن سندور میں ناکامی چھپانے کی ایک ناکام کوشش ہے۔

ترجمان نے بھارتی بیانیے کو “نام نہاد جوہری بلیک میلنگ” قرار دیتے ہوئے کہا کہ یہ دعوے بے بنیاد، من گھڑت اور اشتعال انگیز ہیں، جو کہ خطے کے امن و استحکام کے لیے خطرہ بن سکتے ہیں۔

دفتر خارجہ نے مزید کہا کہ پاکستان کی مسلح افواج نے نشانے پر موجود دشمن کے فوجی مراکز کو کامیابی سے نشانہ بنایا، جن کی تفصیلات 12 مئی کو آئی ایس پی آر کی جانب سے جاری کی گئی پریس ریلیز میں موجود ہیں۔

دفتر خارجہ نے عالمی برادری پر زور دیا کہ وہ بھارتی میڈیا کے ذریعے پھیلائی جانے والی جھوٹی اور اشتعال انگیز خبروں پر نظر رکھے، کیونکہ ایسے دعوے نہ صرف سچائی کو مسخ کرتے ہیں بلکہ بین الاقوامی سلامتی اور جنوبی ایشیاء کے امن کو بھی خطرے میں ڈالتے ہیں۔