پاک فوج نے بھارت کو ایسا سبق سکھایا جو وہ کبھی نہیں بھولے گا :ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چودھری نے کہا کہ پاکستان کی مسلح افواج نے بھارتی فوج کو ایسا سبق سکھایا ہے جو وہ کبھی نہیں بھولیں گے۔ انہوں نے کہا کہ جو عسکری حکمت عملی اپنائی گئی، وہ آئندہ کئی دہائیوں تک فوجی اداروں میں پڑھائی جائے گی۔

پاک فوج کی عسکری برتری اور عوامی اعتماد
انہوں نے کہا کہ پاکستانی فوج نے بھارت پر عسکری برتری حاصل کی اور اسے اپنے مقاصد میں ناکامی کا سامنا کرنا پڑا۔ اس کامیابی سے پاکستانی عوام کے دلوں میں فوج کے لیے محبت اور اعتماد مزید بڑھا ہے۔

فتح کا فیصلہ عوام اور دنیا کرے گی
انٹرویو میں انہوں نے کہا کہ ہم ہمیشہ کہتے ہیں کہ جنگ ہماری ہوتی ہے اور فتح اللہ کی۔ اس سوال کا درست جواب بین الاقوامی برادری اور غیر جانبدار مبصرین ہی دے سکتے ہیں۔ اگر کوئی سچ جاننا چاہے تو وہ پاکستانی عوام کی خوشیوں اور جشن کو دیکھے۔

لڑائی صرف فوجی محاذ تک محدود نہیں
ترجمان پاک فوج کا کہنا تھا کہ یہ لڑائی صرف عسکری محاذ یا زمینی و فضائی جھڑپوں تک محدود نہیں تھی، بلکہ پاکستان نے بھارت کے جھوٹ، فریب، دباؤ اور پروپیگنڈے کو بھی بے نقاب کیا۔

پہلگام واقعہ اور بھارتی جھوٹ
انہوں نے بتایا کہ پہلگام واقعے کے بعد بھارت نے ایک جھوٹی کہانی گھڑی، لیکن پاکستان کا مؤقف واضح تھا کہ اگر کسی پاکستانی کے ملوث ہونے کا ثبوت ہے تو وہ کسی معتبر ادارے کو دیا جائے۔ بھارت آج تک کوئی ثبوت نہیں دے سکا۔

بھارتی فضائی حملے کی ناکامی
ڈی جی آئی ایس پی آر نے کہا کہ بھارت اپنی مرضی کی جگہ اور وقت پر آیا، ہم نے ان کے 6 جہاز گرائے اور اعلان کے ساتھ بھرپور جواب دیا۔ ہم نے اندھیرے میں حملہ نہیں کیا، بلکہ 26 اہداف چُن کر انہیں نشانہ بنایا۔

اطلاعاتی میدان میں سچ کی فتح
ان کا کہنا تھا کہ پاکستان نے معلومات کے میدان میں سچ بولا جبکہ بھارت مسلسل جھوٹ بولتا رہا۔ انہوں نے کہا کہ بھارتی میڈیا اور حکومت نے جعلی تصویریں اور جھوٹے دعوے کیے جو دنیا نے مسترد کر دیے۔

پاکستان کے اصول: مقدس مقامات کا احترام
انہوں نے کہا کہ بھارت نے الزام لگایا کہ پاکستان نے امرتسر میں گولڈن ٹیمپل پر حملہ کیا، جو کہ مضحکہ خیز ہے۔ پاکستان تمام مذہبی مقامات اور عقائد کا احترام کرتا ہے، ہم کسی بھی شہری یا مذہبی مقام کو نشانہ نہیں بناتے۔

بھارتی ساکھ اور میڈیا کا حال
ترجمان پاک فوج نے کہا کہ بھارتی حکومت اپنی ساکھ جھوٹ بول کر بنانے کی کوشش کر رہی ہے، مگر سچ ہی ساکھ بناتا ہے۔ پاکستان نے کسی صحافی کو گرفتار نہیں کیا، اور نہ ہی آزادی اظہار پر پابندی لگائی۔

مسلح افواج اور قوم کی ہم آہنگی
انہوں نے کہا کہ حالیہ کشیدگی کے دوران بری، بحری، فضائی افواج، سیاسی قیادت اور پوری قوم ایک پیج پر تھیں۔ ہم نے ایک فولادی دیوار کھڑی کی ہے جو کسی بھی بھارتی جارحیت کا ڈٹ کر مقابلہ کر سکتی ہے۔

بھارتی جنگی جنون اور اقلیتوں پر مظالم
لیفٹیننٹ جنرل احمد شریف نے کہا کہ بھارت میں مسلمانوں، عیسائیوں، سکھوں اور دیگر اقلیتوں پر ظلم ہو رہا ہے۔ یہ بھارتی سیاسی ذہنیت کا نتیجہ ہے جو انتہا پسندی پر مبنی ہے اور امن کی راہ میں رکاوٹ ہے۔

کشمیر اور سندھ طاس معاہدہ
انہوں نے واضح کیا کہ کشمیر ایک متنازع علاقہ ہے اور اگر کل کشمیر پاکستان کا حصہ بنتا ہے تو تمام دریا پاکستان کے ہوں گے۔ انہوں نے کہا کہ صرف ایک پاگل شخص ہی یہ سوچ سکتا ہے کہ وہ 24 کروڑ لوگوں کا پانی روک سکتا ہے۔

غزہ کے مظالم پر دوٹوک مؤقف
غزہ کی صورتحال پر بات کرتے ہوئے انہوں نے کہا کہ وہاں جو کچھ ہو رہا ہے وہ نسل کشی ہے، جو ناقابل قبول ہے۔ یہ واقعات ہمیں سکھاتے ہیں کہ اپنے دفاع کے لیے مضبوط ہونا ضروری ہے۔