پاکستان کے لیے بڑی سفارتی اور فضائی کامیابی: برطانیہ نے پاکستانی ایئرلائنز پر عائد پابندیاں ختم کر دیں

اسلام آباد/لندن: پاکستان کے لیے ایک اہم اور خوش آئند پیشرفت سامنے آئی ہے۔ برطانیہ نے پاکستانی ایئرلائنز کا نام اپنی ایئر سیفٹی لسٹ سے نکال دیا ہے، جس کے بعد اب پاکستانی ایئرلائنز برطانیہ کے لیے پروازوں کی اجازت کی درخواست دے سکتی ہیں۔ اس بات کا اعلان برطانوی ہائی کمیشن کی جانب سے جاری کردہ اعلامیے میں کیا گیا۔

ایوی ایشن سیفٹی میں بہتری پر برطانیہ کا اعتماد

برطانوی ہائی کمیشن کے مطابق یہ فیصلہ یو کے ایئر سیفٹی کمیٹی نے پاکستان کی ایوی ایشن سیفٹی میں بہتری کے پیش نظر کیا۔ کمیٹی نے ایک آزاد اور تکنیکی عمل کے ذریعے پاکستان کو سیفٹی لسٹ سے خارج کرنے کا فیصلہ کیا، جو پاکستان سول ایوی ایشن اتھارٹی (PCAA) کی کاوشوں کا اعتراف ہے۔

اب پاکستانی ایئرلائنز کو برطانیہ میں پروازوں کے آغاز کے لیے یو کے سول ایوی ایشن اتھارٹی (UK CAA) سے باضابطہ اجازت لینا ہو گی۔

برطانوی ہائی کمشنر کا اظہارِ مسرت

برطانوی ہائی کمشنر جین میریٹ نے کہا کہ وہ پاکستانی ایئرلائن سے سفر کرنے کی منتظر ہیں اور پاکستان و برطانیہ کے ماہرین کے درمیان تعاون پر شکریہ ادا کیا۔ ان کا کہنا تھا کہ اس پیش رفت سے دونوں ممالک کے درمیان فضائی رابطے بہتر ہوں گے، جس سے خاندانوں کے ملاپ اور تجارتی سرگرمیوں کو فروغ ملے گا۔

تجارتی شراکت داری میں بھی اہم کردار

اعلامیے میں مزید بتایا گیا کہ پاکستان، برطانیہ کا تیسرا بڑا تجارتی شراکت دار ہے، اور دونوں ممالک کے درمیان سالانہ تجارتی حجم £4.7 بلین سے تجاوز کر چکا ہے۔ فضائی روابط میں بہتری سے اس تجارتی شراکت داری کو مزید وسعت ملنے کی توقع ہے۔

یہ فیصلہ نہ صرف پاکستانی ایوی ایشن سیکٹر کے لیے ایک بڑی کامیابی ہے بلکہ پاکستان کے عالمی امیج اور سفارتی تعلقات کے فروغ میں بھی اہم سنگ میل ثابت ہو سکتا ہے۔