پاکستان کا علاقائی استحکام میں مثبت کردار، امریکی وزیر خارجہ مارکو روبیو کی تعریف

اسلام آباد: امریکی وزیر خارجہ مارکو روبیو نے خطے میں استحکام قائم رکھنے اور ایران کے ساتھ مکالمے میں ثالثی کے کردار پر پاکستان کی کوششوں کو سراہا ہے۔ امریکی محکمہ خارجہ کی جانب سے جاری کردہ اعلامیے میں کہا گیا ہے کہ مارکو روبیو نے پاکستانی وزیر خارجہ اسحاق ڈار سے ملاقات میں پاکستان کے مثبت اور تعمیری کردار کو سراہتے ہوئے کہا کہ ایران کے ساتھ ثالثی کا کردار قابل تحسین ہے۔

اعلامیے کے مطابق ملاقات میں دونوں ممالک نے دہشت گردی کے خاتمے کے لیے دوطرفہ تعاون کو مزید فروغ دینے پر تبادلہ خیال کیا۔ اس موقع پر داعش خراسان کے خلاف مشترکہ حکمت عملی پر بھی بات ہوئی۔ ترجمان کے مطابق اگست میں اسلام آباد میں پاکستان اور امریکا کے درمیان انسداد دہشت گردی سے متعلق اہم مذاکرات ہوں گے۔

ملاقات میں تجارتی تعلقات پر بھی خصوصی زور دیا گیا۔ دونوں وزرائے خارجہ نے معدنیات اور مائننگ سیکٹر میں تعاون کے امکانات کا جائزہ لیا اور اسے مستقبل میں اقتصادی شراکت داری کی ایک نئی جہت قرار دیا۔

بعد ازاں میڈیا سے گفتگو کرتے ہوئے وزیر خارجہ اسحاق ڈار نے کہا کہ پاکستان امریکا سے امداد نہیں بلکہ تجارت چاہتا ہے۔ انہوں نے امید ظاہر کی کہ امریکا کے ساتھ تجارتی معاہدہ آئندہ چند ہفتوں میں طے پا جائے گا۔ انہوں نے اس بات پر بھی زور دیا کہ پاکستان بھارت کے ساتھ تمام تنازعات، بشمول مسئلہ کشمیر، پر مذاکرات کے لیے تیار ہے اور دہشت گردی جیسے اہم مسئلے پر بھی بات چیت کے لیے تیار ہے۔

اس سے قبل دفتر خارجہ کے ترجمان نے بتایا کہ امریکی وزیر خارجہ مارکو روبیو نے دہشت گردی کے خلاف جنگ میں پاکستان کی لازوال قربانیوں کو سراہا اور کہا کہ پاکستان نے عالمی اور علاقائی امن کے قیام میں ہمیشہ مثبت اور ذمے دارانہ کردار ادا کیا ہے۔