یومِ استحصال کشمیر: وزیراعظم شہباز شریف کا کشمیریوں کے ساتھ غیر متزلزل یکجہتی کا اعادہ

اسلام آباد: وزیراعظم پاکستان محمد شہباز شریف نے یومِ استحصال کشمیر کے موقع پر اپنے خصوصی پیغام میں بھارت کے غیر قانونی اور یکطرفہ اقدامات کی شدید الفاظ میں مذمت کرتے ہوئے کہا ہے کہ پاکستان کشمیری عوام کے حقِ خودارادیت کے لیے ہر ممکن سیاسی، سفارتی اور اخلاقی حمایت جاری رکھے گا۔

وزیراعظم نے کہا کہ 5 اگست 2019 کا دن بھارتی بربریت کی ایک سنجیدہ یاد دہانی ہے، جب نئی دہلی حکومت نے مقبوضہ جموں و کشمیر کی آئینی حیثیت کو ختم کر کے کشمیریوں کے بنیادی حقوق سلب کیے۔ ان کے مطابق بھارت کا غیر قانونی قبضہ نہ صرف اقوام متحدہ کی قراردادوں بلکہ بین الاقوامی قوانین کی بھی کھلی خلاف ورزی ہے اور یہی قبضہ جنوبی ایشیا میں عدم استحکام کی سب سے بڑی وجہ ہے۔

بھارتی تسلط پسند ایجنڈا بے نقاب

وزیراعظم شہباز شریف نے کہا کہ کشمیری قیادت کو خاموش کر دینے کی کوششیں اور سیاسی سرگرمیوں پر پابندیاں بھارت کے تسلط پسند، انتہا پسند اور فرقہ وارانہ ایجنڈے کا حصہ ہیں۔ ان کا کہنا تھا کہ کشمیری عوام کو اپنے ہی وطن میں بے اختیار اقلیت بنا دینے کا خطرہ لاحق ہے جو انسانی حقوق کی سنگین خلاف ورزی ہے۔

مسئلہ کشمیر خارجہ پالیسی کا اہم ستون

وزیراعظم نے کہا کہ مسئلہ کشمیر کا منصفانہ اور پُرامن حل پاکستان کی خارجہ پالیسی کا ایک اہم ترین ستون ہے۔ انہوں نے عالمی برادری، اقوام متحدہ، اور انسانی حقوق کی تنظیموں سے مطالبہ کیا کہ وہ مقبوضہ جموں و کشمیر میں بھارتی مظالم اور انسانی حقوق کی خلاف ورزیوں کا نوٹس لیں اور بھارتی حکومت کو جواب دہ ٹھہرائیں۔

پاکستان کا وعدہ

وزیراعظم شہباز شریف نے اعادہ کیا کہ پاکستان ہر فورم پر کشمیری عوام کی سفارتی، سیاسی اور اخلاقی مدد کرتا رہے گا، جب تک وہ اپنا جائز حق خودارادیت حاصل نہیں کر لیتے۔ انہوں نے کہا کہ پوری پاکستانی قوم کشمیریوں کے ساتھ کندھے سے کندھا ملا کر کھڑی ہے اور ان کی قربانیوں کو رائیگاں نہیں جانے دے گی۔