پاکستان اقلیتوں کے حقوق کے تحفظ کے لیے دنیا کے ساتھ کھڑا ہے: شہباز شریف

وزیراعظم محمد شہباز شریف نے کہا ہے کہ پاکستان اقلیتوں کے حقوق کے تحفظ کے لیے دنیا کے ساتھ کھڑا ہے اور ان کی مذہبی آزادی کے لیے ہمیشہ کوشاں رہے گا۔

انہوں نے کہا کہ اقلیتوں کی فلاح و بہبود حکومت کی اولین ترجیحات میں شامل ہے اور ان کی ناقابلِ فراموش خدمات کو قومی اثاثہ سمجھا جاتا ہے۔

اقلیتوں کو تمام شہری و مذہبی حقوق حاصل ہیں

شہباز شریف نے اس بات پر اطمینان کا اظہار کیا کہ آج پاکستان میں اقلیتوں کو مکمل شہری اور مذہبی آزادی میسر ہے۔ انہوں نے کہا کہ حکومت ہر سطح پر اقلیتوں کے تحفظ اور ترقی کے لیے اقدامات کر رہی ہے۔

بانی پاکستان کے وژن کی تجدید

وزیراعظم نے کہا کہ بانی پاکستان قائداعظم محمد علی جناح کی 11 اگست 1947 کی تاریخی تقریر اقلیتوں کے محفوظ مستقبل کی نظریاتی ضمانت ہے۔ انہوں نے اس عزم کا اعادہ کیا کہ اقلیتوں کو مساوی مواقع فراہم کر کے قومی ترقی میں ان کا کردار مزید مؤثر بنایا جائے گا۔

اقلیتوں کی حب الوطنی اور ثقافتی ورثہ

شہباز شریف نے کہا کہ پاکستان کو اقلیتوں کے جذبہ حب الوطنی اور ثقافتی ورثے پر فخر ہے۔ انہوں نے کہا کہ حکومت اقلیتوں کی قومی دھارے میں بھرپور شمولیت کے لیے پرعزم ہے اور اس مقصد کے لیے عملی اقدامات جاری رکھے گی۔