پنجاب کے سات اضلاع میں سیلابی صورتحال کے باعث فوج طلب

محکمہ داخلہ پنجاب نے شدید سیلابی خطرات کے پیشِ نظر صوبے کے سات اضلاع میں فوج کی تعیناتی کے لیے وفاقی وزارت داخلہ کو باضابطہ مراسلہ بھیج دیا ہے۔ اس اقدام کا مقصد متاثرہ علاقوں میں انسانی جانوں کا تحفظ، بروقت امدادی کارروائیاں اور ممکنہ انخلا کو یقینی بنانا ہے۔

فوج کی تعیناتی کے اضلاع
سیلابی خطرات کے باعث لاہور، قصور، سیالکوٹ، سرگودھا، فیصل آباد، نارووال اور اوکاڑہ میں فوج کو طلب کیا گیا ہے۔ فوجی دستے ضلعی انتظامیہ کے ساتھ مل کر امدادی اور ریسکیو سرگرمیوں میں حصہ لیں گے۔

امدادی کارروائیوں کے لئے خصوصی انتظامات
مراسلے کے مطابق چھ اضلاع میں فوجی دستوں کی تعداد ضلعی انتظامیہ کی مشاورت سے طے کی جائے گی۔ ضرورت پڑنے پر آرمی ایوی ایشن، کشتیوں اور دیگر وسائل کی فراہمی بھی یقینی بنائی جائے گی تاکہ متاثرہ علاقوں میں بروقت ریسکیو اور امدادی سرگرمیاں ممکن بن سکیں۔

ضلعی ادارے پہلے ہی الرٹ
ضلعی انتظامیہ، ریسکیو 1122، سول ڈیفنس اور پولیس پہلے ہی الرٹ اور متحرک ہیں۔ تاہم بڑے پیمانے پر ممکنہ انخلا اور سیلابی خطرات سے نمٹنے کے لیے فوج کی شمولیت کو ناگزیر قرار دیا گیا ہے۔

عوام سے تعاون کی اپیل
حکومت اور امدادی اداروں نے عوام سے اپیل کی ہے کہ وہ ہدایات پر عمل کریں، غیر ضروری نقل و حرکت سے گریز کریں اور ریسکیو اداروں کے ساتھ مکمل تعاون کریں تاکہ جانی نقصان سے بچا جا سکے۔