اسلام آباد دھماکا: اقوامِ متحدہ کی مذمت، دہشتگردوں کو انصاف کے کٹہرے میں لانے کا مطالبہ

اقوامِ متحدہ کے سیکرٹری جنرل انتونیو گوتریس نے اسلام آباد میں ہونے والے دہشتگردانہ حملے کی سخت الفاظ میں مذمت کی ہے۔ انہوں نے قیمتی جانوں کے ضیاع پر گہرے دکھ کا اظہار کرتے ہوئے متاثرہ خاندانوں سے تعزیت اور زخمیوں کی جلد صحتیابی کے لیے نیک خواہشات کا اظہار کیا۔

اقوامِ متحدہ کا بیان

جاری کردہ بیان میں انتونیو گوتریس نے کہا کہ اسلام آباد میں ہونے والے خود کش دھماکے کی خبر انتہائی افسوسناک ہے۔ انہوں نے کہا کہ دہشتگردی ایک عالمی لعنت ہے جس کی کوئی اخلاقی یا سیاسی جواز نہیں، اور اس کے خلاف بین الاقوامی برادری کو متحد ہو کر کام کرنا ہوگا۔

انصاف اور تحقیقات کا مطالبہ

اقوامِ متحدہ کے سربراہ نے زور دیا کہ دہشتگردی میں ملوث عناصر کو قانون کے مطابق انصاف کے کٹہرے میں لایا جائے اور حملے کی مکمل اور شفاف تحقیقات کی جائیں۔ ان کا کہنا تھا کہ اقوامِ متحدہ پاکستان کے ساتھ دہشتگردی کے خاتمے اور امن کے قیام کے لیے تعاون جاری رکھے گا۔

واقعے کی تفصیل

واضح رہے کہ گزشتہ روز اسلام آباد کچہری کے باہر فتنہ الخوارج کے خود کش حملے میں 12 افراد شہید اور 36 زخمی ہوئے تھے۔ خود کش بمبار نے اس وقت خود کو دھماکے سے اڑا لیا جب سیکیورٹی اہلکاروں نے مشکوک حرکات کے باعث اسے روکا۔ دھماکے کے نتیجے میں قریب کھڑی گاڑیاں اور عمارتیں بھی متاثر ہوئیں۔

عالمی ردِعمل

امریکا اور چین کے سفارتخانوں نے بھی دہشتگردی کے اس واقعے کی مذمت کرتے ہوئے پاکستان کے عوام اور حکومت سے یکجہتی کا اظہار کیا۔ عالمی رہنماؤں نے دہشتگردی کے خاتمے کے لیے مربوط عالمی اقدامات پر زور دیا۔