اسلام آباد میں عالمی مقابلہ قرات: مختلف ممالک کے قراء اکرام اور منصفین کی آمد

اسلام آباد میں ہونے والے عالمی مقابلۂ قراءت کے لیے مختلف ممالک سے معروف قرّاء کرام اور انٹرنیشنل ججز کی پاکستان آمد کا سلسلہ شروع ہوگیا ہے۔ وزارتِ مذہبی امور کے زیرِ اہتمام یہ مقابلہ 24 سے 27 نومبر تک جاری رہے گا، جس میں دنیا بھر سے قراء شرکت کریں گے۔

بین الاقوامی مہمانوں کی آمد اور استقبال

ابتدائی طور پر چاڈ سے قاری احمت، صومالیہ سے قاری عبدالقادر ابدی وہاب ادن اور گھانا سے قاری ابوالمال سواللہ اسلام آباد پہنچ چکے ہیں۔ وزارتِ مذہبی امور کے افسران نے اسلام آباد ایئرپورٹ پر معزز مہمانوں کا پرتپاک استقبال کیا۔

آج مزید متعدد ممالک سے قراء اور ججز کی آمد متوقع ہے، جن میں مصر سے انٹرنیشنل جج قاری الشیخ ڈاکٹر حمد اللہ حفیظ محمد ابرہیم، بحرین سے قاری حمزہ معیز احمد علی، اردن سے قاری احمد بکری حسن نواسرہ، فلسطین سے قاری نبیل محمد علی شریباطی شامل ہیں۔
اسی فہرست میں قازقستان سے قاری مان محمد، مالی سے قاری دیالو آمادو، برکینا فاسو سے قاری دیالو موسی، موریطانیہ سے قاری احمد احمد مسکے اور کوموروس سے قاری عبدُاالفضل الدین بھی پاکستان پہنچیں گے۔

چار روزہ عالمی مقابلہ

وزارتِ مذہبی امور کے مطابق قرآنِ کریم کی عالمی تلاوت کے اس بڑے مقابلے کے لیے تمام انتظامات مکمل کر لیے گئے ہیں۔ دنیا بھر سے نامور قرّاء اور عالمی سطح کے منصفین کی آمد اسلام آباد میں ایک روحانی، پرنور اور بابرکت ماحول پیدا کرے گی۔

مقابلہ مجموعی طور پر 4 روز جاری رہے گا، جس میں مختلف ممالک سے آئے ہوئے قاری حضرات اپنی قراءت کے ذریعے شرکت کریں گے۔

چالیس ممالک کی شرکت

معروف قاری صداقت علی کے مطابق اس سال کے مقابلے میں مجموعی طور پر 40 ممالک سے قراء کرام شرکت کریں گے۔ انہوں نے کہا کہ یہ مقابلہ مکمل طور پر عالمی معیار کے مطابق منعقد کیا جائے گا اور پاکستان دنیا بھر کے قراء کے لیے ایک بڑا روحانی مرکز ثابت ہوگا۔