پی ٹی آئی ملک دشمن بیانیہ ترک کرکے ریاست و عوامی مفاد کو مقدم رکھے:عطاء اللہ تارڑ

وفاقی وزیر اطلاعات و نشریات عطاء اللہ تارڑ نے پاکستان تحریک انصاف اور اس کی حالیہ سیاسی حکمتِ عملی پر کڑی نکتہ چینی کرتے ہوئے کہا ہے کہ پارٹی کو اپنا ملک مخالف بیانیہ ترک کر کے ریاست اور عوام کے مفاد کو اولین ترجیح دینا ہوگی۔ انہوں نے یہ مؤقف ایکس پر جاری بیان میں اختیار کیا۔

غیر قانونی مطالبہ

عطاء اللہ تارڑ نے کہا کہ پی  ٹی آئی  اور خصوصاً وزیراعلیٰ خیبر پختونخوا سہیل آفریدی نے ایسا طرزِ سیاست اپنایا ہے جس میں صوبے کے عوام کی گورننس کو پسِ پشت ڈال دیا گیا ہے۔انہوں نے کہا کہ پوری توجہ ایک ایسے غیر قانونی مطالبے پر ہے کہ کرپشن کیس میں اڈیالہ جیل میں سزا کاٹنے والے بانی پی ٹی آئی سے ہی سیاسی رہنمائی لی جائے، جو جیل قوانین کے منافی ہے۔

 حساس صوبے میں ترجیحات

وفاقی وزیر نے کہا کہ دہشت گردی کے حوالے سے انتہائی حساس صوبہ ہونے کے باوجود صوبائی حکومت کی ترجیحات امن، ترقی اور عوامی ریلیف کے بجائے اسی بیانیے کے گرد گھومتی رہیں جس نے صوبائی سطح پر انتظامی عمل کو متاثر کیا۔

 افغانستان و بھارتی میڈیا

عطاء اللہ تارڑ نے مزید الزام عائد کیا کہ پی ٹی آئی کی ایک خاتون رہنما نے منفی حکمتِ عملی کے تحت افغانستان سے چلنے والے پاکستان دشمن اکاؤنٹس اور بھارتی میڈیا کے ذریعے عمران خان سے متعلق گھٹیا مہم چلائی، جس کا مقصد عالمی سطح پر پاکستان کی بدنامی تھا۔

پی  ٹی آئی بیانیہ تبدیل کرے

انہوں نے کہا کہ ایسے اقدامات ملک کے وقار کو نقصان پہنچاتے ہیں اور یہ طرزِ عمل کھلی پاکستان دشمنی کے مترادف ہے۔عطاء اللہ تارڑ نے مطالبہ کیا کہ پی ٹی آئی فوری طور پر اپنا بیانیہ تبدیل کرے اور ریاستی مفاد کو مقدم رکھتے ہوئے قومی استحکام میں کردار ادا کرے۔