سابق انگلش کرکٹر مونٹی پنیسر کی عامر خان کیخلاف ٹوئٹ

بالی وڈ اداکار عامر خان اپنی نئی فلم لال سنگھ چڈھا کی وجہ سے ان دنوں شدید تنقید کا شکار ہیں۔

عامر خان کی فلم کے بائیکاٹ کی مہم بھی سوشل میڈیا پر ٹرینڈ کر رہی ہے۔ اب سابق انگلش کرکٹر مونٹی پنیسر نے بھی عامر خان اور ان کی فلم کیخلاف ٹوئٹ کی ہے۔
اپنے ٹویٹر پیغام میں مونٹی پنیسر نے لال سنگھ چڈھا کے بائیکاٹ کی مہم کی حمایت کرتے ہوئے کہا کہ یہ فلم بھارتی مسلح افواج اور سکھوں کیلئے ہتک آمیز ہے۔
یہ فلم 1994 میں بننے والی ہالی وڈ فلم فاریسٹ گمپ کا ہندی ری میک ہے جس کی کہانی ایک کم ذہین شخص کے گرد گھومتی ہے جو امریکی فوج میں شمولیت کیلئے کافی جدوجہد کرتا ہے اور اس میں کامیابی کے بعد تاریخ میں اپنا نام درج کرا لیتا ہے۔ مونٹی پنیسر کا کہنا ہے کہ امریکی فوج ویتنام جنگ کیلئے LOW IQ والے افراد کو بھرتی کر رہی تھی لہٰذا ہالی وڈ فلم کا کہیں نہ کہیں جواز بنتا ہے لیکن بھارتی فلم میں اس کہانی کو استعمال کرنا اور مرکزی کردار میں سکھ کو دکھانا نامناسب ہے۔
لال سنگھ چڈھا آج یعنی 11 اگست کو ریلیز کی گئی ہے۔ فلم میں عامر خان کے مقابل کرینہ کپور نے مرکزی کردار نبھایا ہے۔