قومی معیشت مستحکم اور اسٹاک مارکیٹ میں ٹھہراؤ آ گیا ہے، عمران خان

اسلام آباد: وزیراعظم عمران خان نے کہا ہے کہ قومی معیشت مستحکم ہوگئی اور اسٹاک مارکیٹ میں ٹھہراؤ آ گیا۔ غیرملکی سرکاری میں اضافے سے مزید بہتری آئے گی۔

وزیراعظم عمران خان نے چینی کمپنیوں کے ساتھ ٹائروں کی تیاری کے معاہدے پر دستخط کی تقریب سے خطاب کرتے ہوئے کہا کہ چینی کمپنی کی سرمایہ کاری کا خیرمقدم کرتاہوں، پاکستان میں غیرملکی سرمایہ کاری آناشروع ہوگئی ہے، جیسےجیسےسرمایہ کاری آئیگی معیشت مزید مستحکم ہوگی اور نوکریاں ملنا شروع ہو جائیں گی۔

عمران خان نے کہا کہ جب تحریک انصاف نے حکومت سنبھالی تومعیشت بری حالت میں ملی، لیکن اب قومی معیشت مستحکم ہو گئی اور اسٹاک مارکیٹ میں بھی ٹھہراؤ آگیا ہے، اب یہ آگے بڑھے گی، ڈالر کے مقابلے میں روپے کی قدر بھی مستحکم ہوچکی ہے، گزشتہ3ماہ میں روپےکی قدر میں نمایاں اضافہ ہوا ہے۔

عمران خان نے مزید کہا کہ سرمایہ کاروں کیلئے سہولتیں پیدا کر رہے ہیں اور عالمی مالیاتی اداروں نے بھی تسلیم کیا ہے کہ پاکستان کی سمت درست ہے۔