آنے والے مہینوں میں مہنگائی بڑھنے کی شرح میں کمی آئے گی، گورنر اسٹیٹ بینک

کراچی: اسٹیٹ بینک آف پاکستان کے گورنر سید رضا باقر نے کہا ہے کہ آنے والے مہینوں میں مہنگائی بڑھنے کی شرح میں کمی آئے گی۔ جس کے باعث شرح سود بھی کم ہو گی۔

کراچی میں بزنس کانفرس سے خطاب میں گورنر سٹیٹ بینک رضا باقر کا کہنا تھا کہ پائیدار ترقی کے لیے برآمدات بڑھانے کے سوا اور کوئی چارہ نہیں ہے۔ برآمد کنندگان اور چھوٹے کاروبار کے لیے رعایتی شرح سود پر قرضے دیئے جاتے ہیں۔

گورنر اسٹیٹ بینک کا کہنا تھا کہ لوگ شرح سود اور کرنسی کی قدر پر تبصرے دیتے ہیں لیکن مانیٹری پالیسی سٹیٹمنٹ نہیں پڑھتے۔ آنے والے مہینوں میں توقع کر رہا ہوں کہ مہنگائی اور شرح سود میں کمی ہوگی اور ہر شعبے میں آپ کو بہتری نظر آئے گی

کانفرنس سے سابق جوائنٹ چیف آف سٹاف جنرل ریٹائرڈ زبیر حیات نے بھی خطاب کیا۔ ان کا کہنا تھا کہ پاکستانی قوم خصوصاً نوجوانوں میں بہت صلاحیت ہے۔ نوجوان پوری دنیا میں اپنی قابلیت کا لوہا منوا رہے ہیں۔ ہمیں اپنا تعلیمی نصاب تبدیل کرنے کی ضرورت ہے۔

جنرل ریٹائرڈ زبیر محمود حیات کا کہنا تھا کہ اقوام متحدہ کے جنرل سیکریٹری کا کہنا ہے کہ یہ قوم پندرہ سالوں میں دہشت گردی سے نمٹ کر سیاحتی مقام میں منتقل ہو گئی ہے۔ یہ باتیں ہمارے لیے بہت حوصلا افزا ہیں۔