پاکستان کا افغانستان کے ساتھ سرحد پر خرلاچی میں بارڈر مارکیٹ قیام کا فیصلہ

اسلام آباد: پاکستان نے افغانستان کی سرحد پر پہلی بارڈر مارکیٹ کے قیام کیلئے جگہ کا تعین کرلیا، پائلٹ پراجیکٹ کے طور پر کرم کے علاقے خرلاچی میں بارڈر مارکیٹ قائم کرنے کا فیصلہ کیا گیا ہے۔

وزارت تجارت کے ذرائع نے نیوز ڈپلومیسی کو بتایا ہے کہ حکومت نے افغانستان اور ایران کی سرحدوں پر بارڈر مارکیٹس قائم کرنے کا فیصلہ کیا ہے، پائلٹ پراجیکٹ کے طور پر کرم ایجنسی کے علاقے خرلاچی میں افغانستان کی سرحد پر بارڈر مارکیٹ قائم کرنے کا فیصلہ کیا ہے۔

ذرائع کا کہنا ہے کہ بارڈر مارکیٹ کے قیام کیلئے افغانستان کے ساتھ جلد باہمی مفاہمت کی یاداشت پر دستخط کیے جائیں گے۔ وزیراعظم عمران خان نے بارڈر مارکیٹس کے قیام کے لیے وزارت تجارت کو ٹاسک دیا ہے۔ بارڈر مارکیٹس کے قیام کے حوالے سے سیکیورٹی اداروں،سٹمز اور نادرا کو اعتماد میں لیا جارہا ہے۔

حکومتی زرائع کے مطابق دونوں ممالک کی سرحدوں کے آر پار مخصوص مقامات پر بارڈر مارکیٹس قائم کی جائیں گی، سرحدوں پر باڑ اور اسمگلنگ کی وجہ سے تجارت متاثر ہورہی ہے۔بارڈرز مارکیٹس سے مقامی آبادی کو تجارتی سہولیات میسر آسکیں گی۔