چکی مالکان نے آٹے کی قیمت 70 روپے فی کلوگرام مقرر کردی، عوام میں تشویش کی لہر

لاہور: چکی مالکان نے آٹے کی قیمت میں اضافہ کرکے فی کلو آٹے کی قیمت 70 روپے کردی۔ جس کے بعد عوام کو دو وقت کی روٹی کے لالے پڑ گئے ہیں۔

چکی اونرز ایسوسی ایشن نے آٹے کی قیمت میں اضافہ کرکے فی کلو آٹے کی قیمت 70 روپے مقرر کردی ہے، آٹے کی قیمت میں اضافے کا اطلاق جمعہ 24 جولائی سے ہوگا۔

جنرل سیکرٹری چکی اونرز ایسوسی ایشن عبدالرحمان کا کہنا ہے کہ اوپن مارکیٹ میں گندم کی قیمت میں صرف ایک ہفتہ کی قلیل ترین مدت میں ہوشربا اضافہ ہوا، ایک ہفتے میں آٹے کی فی من قیمت 2100 روپے سے بڑھ کر 2300 روپے ہوگئی۔

جنرل سیکریٹری عبدالرحمان کا کہنا تھا کہ گزشتہ ڈیڑھ ماہ میں 1700 روپے سے بڑھ کر 2300 روپے فی 40 کلو یعنی 15 روپے فی کلو کے ساتھ ساتھ فائن آٹے کی 84 کلو کی بوری بھی 4500 روپے سے بڑھ کر 6500 روپے ہوگئی ہے۔

اپنی بات جاری رکھتے ہوئے عبدالرحمان کا کہنا تھا کہ جس کے بعد عہدیداران کی متفقہ رائے سے کھلا چکی آٹا کی قیمت جمعتہ المبارک سے70 روپے فی کلو مقرر کی گئی ہے۔ ادھر اس ظالمانہ فیصلے پر عوام میں تشویش کی لہر دوڑ گئی، لوگوں کو دو وقت کی روٹی کے لالے پڑ گئے۔