کراچی میں کانگو وائرس ایک اورجان نگل گیا،اموات کی تعداد5 ہوگئی

کراچی: عید قرباں قریب آتے ہیے شہر قائد میں کانگو وائرس کے شکار افراد کی تعداد بڑھنے لگی ہے، کراچی میں رواں برس کانگو وائرس سے ہونے والی اموات کی تعداد پانچ ہو گئیں۔

کانگو سے متاثرہ لانڈھی کا رہائشی 27 سالہ فہیم احمد نجی ہسپتال میں دم توڑ گیا۔ محکمہ صحت سندھ کے مطابق فہیم احمد میں کانگو ہیمریجک بخار کی تصدیق کی گئی تھی۔فہیم بھینس کالونی میں بھینسوں کے باڑے میں کام کرتا تھا۔

اس سے قبل چند روز قبل کوئٹہ سے بھی کانگو وائرس سے متاثرہ اشرف خان کو جناح ہسپتال لایا گیا جہاں وہ آئیسولیشن وارڈ میں زیرعلاج ہے۔ متاثرہ شخص اشرف خان ولد حیات اللہ کوئٹہ بلوچستان کا رہائشی ہے۔

جناح ہسپتال کی ایگزیکٹو ڈائریکٹر ڈاکٹر سیمی جمالی کے مطابق اشرف خان کو آئسولیشن وارڈ میں داخل کیا گیا ہے۔ رواں سال کانگو وائرس سے متاثرہ افراد کی تعداد 10 ہو چکی ہے جب کہ اس خطرناک بیماری کے باعث اب تک مجموعی طور پر ملک بھر میں چھ اموات ہو چکی ہیں جن میں سے 5 کا تعلق کراچی سے تھا۔