پروپیگنڈے کا شکار علاقے ماشوخیل سے انسداد پولیو مہم کا آغاز کر دیا گیا

پشاور: وزیراعظم ٹاسک فورس برائے انسداد پولیو کے فوکل پرسن بابر بن عطا نے ملک بھر میں انسداد پولیو مہم کا افتتاح کر دیا ہے۔

بابر بن عطا نے پروپیگنڈے کا شکار علاقے ماشوخیل سے مہم کا افتتاح کیا۔ انہوں نے کہا کہ اپنے مفاد کیلئے مہم کے بائیکاٹ کا اعلان بے وقوفی ہے۔ جو والدین بچوں کو قطرے نہیں پلاتے، وہ انہیں معذور بنا رہے ہیں۔

فوکل پرسن برائے انسداد پولیو ٹاسک فورس کا کہنا تھا کہ اب تک جو کیسز سامنے آئے، ان بچوں نے پولیو سے بچاؤ کے قطرے نہیں پیے، والدین کو پیار سے رضامند کریں گے۔ کسی مرض سے چھٹکارے کی دوائی کو اپنے مفادات سے نہیں جوڑنا چاہیے۔ خیبرپختونخوا کے 29 اضلاع میں انسداد پولیو مہم چلائی جائے گی۔

وزیراعلیٰ محمود خان نے کہا کہ والدین پولیو ویکسی نیشن کے خلاف جھوٹے پروپیگنڈے اور افواہوں پر کان نہ دھریں۔ادھر کوئٹہ میں بھی سات روزہ خصوصی پولیو مہم کا آغاز ہوگیا ہے۔ بلوچستان کے دیگر اضلاع نصیر آباد، جعفر آباد، جھل مگسی، صحبت پور میں 28 اگست جبکہ قلعہ عبداللہ میں 2 ستمبر سے پولیومہم شروع ہوگی۔

واضح رہے کہ گزشتہ روز بھی خیبرپختونخوا کے علاقوں سے تین جب کہ سندھ سے پولیو کے دو نئے کیسز سامنے آئے تھے جس کے بعد رواں برس رجسٹر ہونے والے پولیو کیسز کی تعداد 58 ہو گئی ہے۔