سندھ میں آٹھویں جماعت تک کے طلبا کو اگلی جماعتوں میں پروموٹ کرنے کا اعلان

کراچی: سائیں سرکار نے کورونا وباء کے باعث سندھ بھر میں آٹھویں جماعت تک کے طلبا کو اگلی جماعتوں میں پروموٹ کرنے کا اعلان کردیا ہے۔

کورونا وائرس کے باعث پیدا صورتحال میں بچوں کی تعلیم کے حوالے سے کراچی میں محکمہ تعلیم سندھ کی اسٹیرنگ کمیٹی کا اجلاس ہوا۔ جسکے بعد پریس کانفرنس کے دوران سعید غنی نے کہا کہ کمیٹی نے پہلی سے آٹھویں جماعت تک کے بچوں کو پروموٹ کرنے کا فیصلہ کیا ہے۔

صوبائی وزیر کا کہنا تھا کہ بچوں کو گزشتہ برس کی کارکردگی کی بنیاد پر پروموٹ کیا جائے گا۔ ہمیں طلبا کے مشکلات کا اندازہ ہے، ایسا کوئی فیصلہ نہیں کریں گے جس سے طلبا کی مشکلات میں اضافہ ہو، بورڈ قوانین میں بغیر امتحان کے طلباء کو پروموٹ نہیں کیا جاسکتا۔

اپنی بات جاری رکھتے ہوئے سعید غنی کا کہنا تھا کہ بورڈ امتحانات پر وفاق سے بات کرکے فیصلہ کریں گے۔ اس کے لیے ہمیں ایک وقت کے لیے ترمیم یا آرڈیننس لانا ضروری ہوگا۔ ممکن ہے کورونا وائرس کے سبب اسکول مزید 6 ماہ تک نہ کھلیں اس لیے چند روز میں آن لائن تعلیمی نظام کا اعلان کرنے جارہے ہیں۔

سعید غنی نے کہا کہ کورونا وائرس کے بعد زندگی بدل چکی ہے، کوئی پتہ نہیں کب کورونا کی ویکسین بنے، ہمیں احتیاط سے کام کرنا ہوگا اور وائرس سے خود کو بچانا ہوگا، این سی سی کے اجلاس میں 15جولائی تک اسکول بند رکھنے کا اعلان کیا گیا، یکم جون کو صوبہ سندھ کے اسکول نہیں کھلیں گے، اسکول کھولنے کی تاریخ کا اعلان بعد میں کیا جائے گا۔